Di tingale ko mabuhi sa lugar diin gidili ang inom! Mao ni ang mga pulong nga giluwatan ni Jerry sa dayon niyang check-in sa International Departure Area sa hugpaanan sa Mactan. Padulong siya adto sa Saudi Arabia kay nadawat nga makatrabaho isip usa ka Project Engineer sa usa ka dakong kompanya didto. Duol usa ka tuig siya didto. Karong hapona, gisugat siya ni Nilo iyang manghod.
Masul-ob ang nawong ni Nilo nga nisulod sa bodega sa tugpaanan diin gipamutang ang mga kargamento. O, kargamento na si Jerry nga gidiskarga sa ayroplano gikan sa Saudi Arabia. Samtang nagbarog si Nilo sa kilid sa bungbong sa bodega duol sa lamesa sa enkargado, may niabot nga forklift. May karga nga kahon. Sulod sa maong kahon ang lungon nga gisudlan sa patay’ng lawas ni Jerry.
Ulitawo pa si Jerry. Wa pay hinigugma. Kay ambisyon niya nga patukuran una og nindot nga balay iyang mga ginikanan. Una siya magminyo. Motrabaho siya sa Saudi Arabia ug balig duha ka tuig. Aron dako siya’g matigum salapi. Wa siya molampos sa iyang ambisyon. Kay nadaut sa iyang bisyo. Inom.
Lantip unta og pangutok si Jerry. King of Engineers siya sa pagraduwar sa kursong Civil Engineering. Daghang kompanya ang nag-ilog nga mopatrabaho niya dinhi sa Sugbo. Iyang gitrabahoan tanan. Gisulayan niya tanan. Apan wa siya nakontento sa suweldo. Niya pa, ang kitaon dinhi sa usa ka tuig, usa lang ka bulan sa abroad. Busa, ni-abroad gyud siya.
Apan mago lagi. Ang tawo nga brayit sa usa ka butang. Mahimong bugo sa laing butang. Kay walay baligyang ilimnon nga makahubog sa Saudi Arabia, nagtimplatimpla siya. Ang coke gisagulan niya’g alcohol. Giinom. Ug nahilo siya.
Igo na lang si Nilo sa paghipos sa lawas sa maguwang. (Kataposan)