Gaw, nia na sab koy nadawat” tingog ni Steve sa pikas linya sa telepono. Samtang nag-draft sa computer og dokumento si Atty. Glen Enriquez ning sayong buntag, nibagting ang telepono sulod sa iyang bupete. Gibiyaan niya iyang gibuhat. Iyang gipunit ang telepono. Unya mao dayon ang nisugat sa iyang dunggan ang tingog sa ig-agaw pag-ingon niyang “Hello”.
Nakaingon si Glen sa iyang kaugalingon nga kun mobayad pa iyang mga ig-agaw sa iyang serbisyo bisag 1/4 lang sa tinood nga taripa, adunahan na siya. Apan kining mga taga-probinsiya, ang ilang kultura nga kun propesyonal ka, obligado kang motabang sa mga paryente, libre. Sakit hunahunaon, kay duna siya’y manghod mismo nga dunay kaso. Doble ang binayran niya. Kay niya pa, mobayad gani siya’s laing tawo, sa igsoon na hinoon dili.
Sa habig sa iyang amahan, duna siya’y mga ig-agaw nga mga anak sa upat ka igsoon sa iyang papa Dencio. Sa habig sa iyang inahan, duna siya’y mga ig-agaw nga mga anak sa duha ka igsoon sa iyang mama Nena.
Kataw-anan ning kaso ni Steve. Usa siya ka seaman. Dako kaayo’g suweldo kay overseas. Naminyo og taga-Dumaguete. Si Glen unta usa sa sponsors sa maong kasal. Apan wa lang gyud kalugar siya’g tambong kay atol nga dunay TRO hearing anang adlaw sa kasal. Kini si Steve, makaingon si Glen nga wa pa gyud na-matured. Bisa’g minyo na, ulitawo gihapon og lihok. Wa kaagwanta ang asawa. Nagpaanular sa kasal.
Gitambagan unta ni Glen iyang ig-agaw nga dili magdalidali og minyo. Kay grabe ka playboy, himabaye o kapalikero. Nakapaanak og kaduha. Nagminyo. Unya lainlain pa gyud og mga kabit. Kun mauli sa Pilipinas, dili mopuyo sa balay nila sa iyang asawa sa Dumaguete. Adto gihapon sa iyang mga ginikanan sa lungsod sa Coricancha. Hugoyhugoy gihapos mga barkada. Dangta’g tulo ka tuig, nipasaka’g kaso nga declaration of nullity of marriage si Betty nga kinaslan ni Steve.
Pagkadawat ni Steve og summons, nikunsulta dayon ni Glen. “Unsa man? Imo ning babagan ang kaso? O magpapildi lang ka?” ni Glen. “Gusto lang sab kong maanular among kasal” ni Steve dihang nibisita sa bupete sa ig-agaw. “Busa, no show ta. Di ta motubag sa complaint. Di ta motambong sa pretrial. Di motambong sa imbistigasyon sa fiscal” ni Glen. “Wa lang gyud tay angay’ng buhaton?” ni Steve. “Wa lang” ni Glen.
“Unsa may nadawat nimo?” ni Glen, hugot ang kinoptan sa telepono. “Notice of Investigation, gikan sa Prosecutor’s Office” ni Steve. “Ay lang nag tagda. Imbistigahon ang kaso sa fiscal. Iyang sutaon kun wa ba mo magsabot sa imong asawa nga magbuwag na lang. O putlon na lang ang higot sa inyong kaminyoon” ni Glen. “Mao ba? Unya kun moingon mi nagkasabot mi nga magbuwag nalang” ni Steve. “Ipa-dismiss sa fiscal ang kaso. Kay gidili sa balaod nga magsabot ang magtiayon nga magbuwag. Mao nay gitawag og collusion. Kun magkasabot mo nga magbuwag, di gyud hinoon mo buwagon” ni Glen. “Kalain god anang balaora. Minaut na kaayo na” ni Steve. “Wa tay mahimo. Kay mao nay balaod. Matud pa, dura lex sid lex. No matter how hard or stupid is the law, that is the law” ni Glen.
“Unya, ok ra kun di nako tungahon ning imbistigasyon?” ni Steve. “Ok lang. No show god atong sabut” ni Glen. “Sigi, gaw. Mosuroy unya ko nimo diha. Masugbasugba ta, tuwa o kilaw ba kaha” ni Steve. “Any time. Pero nahibawo ko. Bisi kaayo ka’g kuyogkuyog sa imong bag-ong uyab nga asawa’s Amerkanong tuas Amerika. Ganahan gyud ka’g babayeng maayong modatung bisa’g subidahon og hitsura” ni Glen nga nagpahiyom. “Wa na gaw. Gibawi na’s Amerikano. Kay daghang naka-teks sa Amerikang mga paryente sa babaye” ni Steve. “Bitaw gaw, kining ako, inamahan ning tambag. Kun manguyab ka man gani, ayaw nang may bana. Barato ra ba kaayo ron ang suhol sa hitman” ni Glen. “Wa na gaw” ni Steve. “Sigi, putlon sa natong istorya. Kay may dinalian kong dokumento” ni Glen dayong butang sa telepono. Nakapanglingo nga nagpahiyom. (Kataposan) (Kadtong magbabasa nga gusto’g libreng konsulta, dad-a ning pahina sa sugilanon sa opisina sa tagsulat. Iatol og Sabado sa buntag)