Adlaw karon nga Lunes ug day off ni Pipoy sa iyang trabaho nga mao usab ang adlaw nga iyang gigahin sa pagbisita sa nagbuntaog nga simbahan ni Mama Mary sa Lindogon, Simala sa lungsod sa Sibonga. Daghan sa mga higala ni Pipoy ang gibati og katingala sa gipakita niining kausaban kun itandi sa nangaging panahon sanglit kaniadto sa matag day off niya adto man kini mopaingon sa tindahan sa pagpakig-inom og ilimnong makahubog sa mga sunog baga nilang silingan.
“Bay,Poy,” sampit ni Pablo kaniya, “Tua na sila si Bay, Ipyot ug Bay Monding sa tindahan ni Inse Tirya., ikaw na lang ang kulang didto.”
“Ingna lang sila Bay Pablo nga dili ko makaadto,” pamalibad ni Pipoy kang Pablo. “Ingna lang nga aduna koy mahinungdanong lakaw ug gawas pa hingpit na usab ako nga mibiya nianang bisyo nga pag-inom og ilimnong makahubng.
“Mao, ba?” ni Pablo pa nga gibati og kahingangha sa gipamulong ni Pipoy. “Ngano unsay nahitabo nga kaniadto ikaw man maoy moingon nga sky is the limit ug beer pa day puslan man nga walay nagmahal.”
“Nausab na ron Bay,” ni Pipoy pa nga matinud-anon sa iyang pagpamulong. “Karon dili na tungod kay akong nakita nga walay maayo nga atong makuha sa pagpunay og inom sa ilimnong makahubog kun dili sakit lang nga matakboy sa atong lawas.
Walay nahimo si Pablo sa pag-agda kang Pipoy og inom niining adlaw sa iyang day off sa trabaho. Milakaw na lamang kini ug mibalik sa tindahan ni Inse Tirya alang sa pagpadayon sa pagpakig-inom sa iyang mga higala nga nagpaabot kaniya.
Nahidangat na ang taksi nga giluwanan ni Pipoy sa ganghaan sa simbahan ni Mama Mary ug giablihan sa guwardiya ang ganghaan alang sa pagpasulod ug pagpahimutang sa parkingan niini.
Nagdali sa pagkanug si Pipoy sa taxi ug mipadayogdog kini sa pagpaingon sa nagbuntaog nga simbahan ni Mama Mary ug mihapit kini sa pagpalit og kandila sa iyang paglabay sa dagkotanan.
Daghan og nabati nga mga estorya si Pipoy mahitungod sa gipakita nga milagro ni Mama Mary sa Lindogon, Simala sa lungsod sa Sibonga, Cebu.
Naglakip na niini ang mga naghambin og balatian nga gibalibaran na sa doktor apan kalit lang nga naayo dihang giampo kini kang Mama Mary.
Adunay bakol nga naglisod apan naulian ug maayo ang paglakaw human sa hugot nga pag-ampo kang Mama Mary nga mao usab kini ang gipangamuyo ni Pipoy sa matag higayon sa iyang pag-ampo niini.
Human sa pagdagkot ni Pipoy sa gidala niyang kandila nagdali sa paghubo sa iyang sapatos ug mipadayon kini sa pagpaingon sa altar nga nahimutang sa imahen ni Mama Mary.
Miluhod si Pipoy ug gisugdan gilayon niya ang iyang pag-ampo ngadto kang Mama Mary nga iyang deboto.
Milungtad og pipila ka gutlo ang gihimong pag-ampo ni Pipoy ug sa iyang pagbarog daw iyang namatikdan ang kaluag sa iyang pagginhawa ug daw gaan na usab nga ilihok ang iyang kalawasan. (Katapusan)