Misiga ang mga mata ni Allan, ingon sa napungot kini pag-ayo sa gisulti sa dalaga. Kalit milupad ang tuong palad sa lalaki ug kini didto motugpa sa nawong ni Salie. Nakahilak ang dalaga sa kasakit.
“Sorry, ha?” nagkanayon si Allan nga ingon sa nagbasol sa iyang gibuhat. Iyang gihapuhap ang aping ni Salie. “Imo man gud kong gipalagot. Dili ako buang, Salie. Nakabati ka? Dili ako buang!”
“Pagawasa ko dinhi Allan! Maluoy ka nako!”
“Mao kanay dili mahimo, Salie. Karon nga ania ka na sa akong mga kamot, dili ako makatugot nga mahimulag ka pa kanako. Dili ako makatugot nga mapanag-iya ka sa lain. Ako ka lang! Andam akong mopatay ug magpakamatay kun adunay magtinguha sa pag-ilog nimo gikan kanako!”
Samtang niining tungora didto sa gawas, layolayo sa gate sa giliyokan og paril nga residensiya ni Allan, dihay mihunong nga usa ka owner-type jeep. Misunod ang usa ka mobile car. Puno sa mga polis ang duha ka sakyanan. Nanaog sila. Mga napulo silang tanan ug pulos armado. Ang nangulo sa mga polis mao si Chief Inspector Yuri Cuyos.
Milihok dayon ang mga polis. Nasayod na sila sa ilang buhaton. Gisenyasan ni Yuri ang usa niya ka sakop ug kini abtik nga milihok, mikatkat sa habog nga paril ug miambak ngadto sa sulod. Giablihan sa polis ang gate ug nanulod ang didto sa gawas kauban si Yuri.
“Men, search the place. Kutob sa mahimo ayaw kamo pagpabuto. Anaa sa sulod ang akong hinigugma. Basig mapagan siya.” Mihatag og instruksiyon si Yuri sa iyang mga sakop. Dayon gikasar niya ang iyang kalibre .45. -- Sumpayan pa