Sa laing bahin, nakamatikod si Angeline nga mora’g naka-recover na si Robert sa ilang break-up. Madasigon na kini kanunay. Giseryoso na niini ang pagtuon. Pero wala siya makabalita nga may gipanguyaban na kining laing babaye human sa ilang panagbuwag.
Usa niana ka higayon, misulod si Angeline sa internet cafe. May gi-research siya sa usa ka website nga may kalabotan sa iyang major subject. Paggawas niya sa internet cafe, maoy iyang nakita si Erik nga nagbarog sa gawas tungod gayod sa pultahan. Kalit lang gikulbaan si Angeline.
“Gusto kong makigsulti nimo,” ni Erik pa. “Please...”
Apan si Angeline misirit paglakaw. Mipaturatoy siya pahilayo kang Erik. Gisangpit siya sa ulitawo apan wala na gyud siya molingi niini.
Gihingpit na gyud ni Angeline ang paglikay kang Erik. Ang iyang gihimo maoy dugang sakripisyo sa kaugalingon niyang pagbati.
Nahigugma siya kang Erik pero dili siya motuo nga nahigugma usab kini kaniya. Alang niya, usa ka pagbugalbugal ang pagpangulitawo ni Erik kaniya. Maoy nagdako sa iyang hunahuna nga imposibleng mahigugma si Erik sa usa ka babaye nga sama lang niya.
-- Sumpayan pa