Gula 140
“Nindot unta kun kita nay sunod kaslon, Angeline,” nagkanayon si Christopher.
“Ayaw na lang pangandoy niana, Christ,” tubag ni Angeline.
“Wa na ba gyud diay paglaom nga maangkon ko pagbalik ang imong gugma ug pagsalig?”
“Wa na koy panahon karon bahin sa gugma. Priority nako ang akong pagtuon.”
“Andam kong magpaabot.”
“Kun ako pa sa imong dapit, mas maayo pang dili ka na lang molaum.”
“Kun mao kana wa na gyud diay koy paglaom?”
“Tingali.”
Ug gitapos ni Angeline ang ilang panagsulti dihang kalit lang mihugyaw didto sa sulod sa balay. Midali pagsulod si Angeline, paghimuntog niya sa sala maoy paglabay ni Carmi sa buwak nga gigunitan niini ug si Angeline ang nakasalo niini.
Sa pagbalik ni Angeline sa Tagbilaran gisuginlan siya ni Vera nga si Erik nagbalik-balik og kadaghan sa boarding house ug nangita kaniya.
“Nabuang na man tingali nang tawhana,” matud ni Angeline.
“Na-in love lagi na nimo, Day,” ni Vera pa. -- Sumpayan pa