Gula 126
“Nakagusto ka niana?” nakamatikod si Allan nga giganid og tan-aw ni Salie ang mga kuwadro sa bungbong. Ingon sa mapasigarbohon ang ulitawo sa lahi nga desinyo sa iyang pinuy-anan.
“Nindot.” Wala makapugong sa pagdayeg ang dalaga.
Midako ang ngisi ni Allan. Gipalingkod niya si Salie sa sopa. Ug niya pa. “Dinhi ka una.”
“Asa ka man diay?” sukit ni Salie.
“Magkuha ko’g pagkaon sa kusina. Wa ka pa tingali manihapon, di ba?”
“Wa pa gyud. Kinsay ganahan sa pagkaon ning nahitabo kanako karon?”
“Igo na niana,” alam-alam ni Allan. Natugkad niya nga gigamhan gayod sa tumang kalagot ang dalaga kang Yuri. “Unsa bay gusto mong pagkaon?”
“Softdrinks lay ako,” ni Salie. “Pakapini’g tinapay kun aduna.”
“Sure.” Dayong talikod sa ulitawo, miadto kini sa kusina.
Nahibilin si Salie diha sa sala. Gipaliraw na usab niya ang iyang mga mata -- nakita niya ang puting kisame. Ang puting bungbong ug ang marmol nga salog.
Unya nasangit ang iyang panan-aw sa knapsack ni Allan nga gipatong sa taas nga sopa. Nabukas og gamay ang siper niini. Nakita niya nga dihay misiwil sa mikang-al nga siper. Mora’g baga nga papel. Nakadapit kini sa iyang pagtagad. Gibira niya’g kalit ang maong butang. Dihadiha nahabwa ang mga baraha. Wala tuyoa nga nahinumdoman ni Salie kadtong patay’ng lawas sa babaye nga ilang nakit-an didto sa bakanteng lote. Dihay barahang queen nga gibutang sa dughan sa maong biktima. -- Sumpayan pa