Gula 7
Ang bino nga giinom nila ni Shirley ug Emil maoy naghatag og dugang kainit kanila sa ilang pagparayganay.
Gibuhong pag-ayo ni Emil si Shirley sa pagromansa. Gusto niya nga matilawan ni Shirley ang romansa nga tingali wala niini matilawi sa iyang bana. Tinuod, mora’g wala mosipyat si Emil.
Daw mora’g nabuang si Shirley dihang gipatilaw ni Emil ang tanang paagi nga iyang nakat-onan. Pareho sila nga daw naglumbaanay pagtungas sa habog kaayo nga bungtod. Nag-abot ang ilang gininhawa.
Human sa ilang kumbati. “Grabeha nimo Mil uy... kadto pa ko nakasuway nga mora ko og mabuang sa kalipay tungod sa grabeng kalalim,” matud ni Shirley. Mipahiyom si Emil nga nakadungog sa komplemento gikan sa byuda.
Migakus ni Emil si Shirley. “Apan mao lagi, dili ka man maako sa hingpit kay duna ka man gayo’y asawa… unya ako byuda,” may tono sa kasubo ang tingog ni Shirley.
“Dili ako ingon niana Shir. Ang tinuod, tug-anan na lang gayud tika nga ikaw maoy akong tuyo nga gipangita nako ang imong gipuy-an.” Daw nakurat si Shirley sa iyang nadungog.
“Dili kami kaila ug si Armando nga imong bana. Ang tinuod, naagian ra nako ang porlon nga gikargahan sa imong bana atul sa paglubong niini ug naikag ko kay inay Ave Maria ang ipatukar, Jealous Guy man ang gipatugtog.”
“Gitug-anan ko sa tanod nga ikaw ang asawa sa namatay nga nagsunod sa porlon, ug wala nako damha nga nabihag ko sa imong kaanyag. Gipaninguha nako nga matultolan ang inyong balay ug nagpatoo nga kaila mi ug ang imong bana Shir,” ni Emil pa samtang naghapyod-hapyod sa buhok sa byuda samtang sila nagtupad paghigda.
Gipangutana ni Emil si Shirley kun nganong Jealous Guy man ang gipatugtog sa paglubong sa iyang bana.
“Ako’y nagbuot niadto kay makahuloganon man kaayo ang kahulogan sa maong kanta,” ni Shirley pa nga mibangon ug mikuha sa iyang selpon. Mipindot-pindot niini ug taud-taud mitukar kini sa kantang Jealous Guy.
“I was dreaming of the past, and my heart was beating fast, I began to loose control, I began to loose control.”
Gihagkan pag-usab ni Emil si Shirley. “Ulitawo ko Shir, wala ko’y kabilinggan ug andam ko nga maoy ilhong amahan sa dos-anyos mo nga anak...Sugot ka?” “Sugot kaayo,” giluknit paghinay ni Shirley ang kilid ni Emil ug silang duha nagkinataw-anay. (Kataposan)