Gula 108
Sukad sa nahimutangan niini malantaw sa sulod sa balay lagbas sa dakong bentana nga gibuksan ang duha — sila si Yuri ug Salie nga malipayong nagkabildo.
May gikuot ang tawo sa bolsa sa gisul-ob niining leather jacket. Paglugwa sa gihulbot niining kamot nga gisul-oban og itom nga guwantis — dihadiha nadala ang usa ka barahang queen nga heart ang buwak. Niadtong tungora (didto sa taas), si Salie kalit lang gikulbaan. Kusog kaayo ang pagbutokbutok sa iyang dughan. Wala tuyoa nga nahapalantaw siya ngadto sa gawas sa bentana.
Ang tawo igmat kaayo, midali kini pag-ipli sa punoan sa kaymito aron dili makit-an nga nanuop siya sa duha.
Naponder pa gihapon ang suga sa poste sa duol. Wala maklaro ni Salie kun tawo ba kadtong mikilab sa iyang panan-aw nga mipasalipod sa kahoy o kadto usa ba lamang ka mata-mata.
“Ngano ka?” nangutana si Yuri ug ginuntan sa pagtan-aw ang dapit nga gipunting sa mga mata sa dalaga.
“M-mora’g may tawo diha sa punoan sa kahoy.”
Mitindog si Yuri ug midungaw sa bentana.
Pagkakita sa tawo nga milili ang alagad sa balaod dihadiha mihinay kini pagpahilayo sa iyang gipasalipdan. Nag-ipli-ipli kini aron dili nila makit-an.
Apan namatikdan pa gihapon kini ni Yuri. Dihadiha nagdali ang ulitawo sa paggawas sa balay.
“Yuri, asa ka?” ni Salie nga gihakop sa kahibulong.
Wala na tubaga ni Yuri ang pangutana sa iyang hinigugma. Mipaturatoy siya paingon sa gate sa koral. Apan ulahi na ang iyang paggawas. Nakalarga na ang gisakyan sa tawo nga kusog kaayong mipahilayo. Wala’y plate number nga gikaw-it sa lawas sa maong sakyanan apan natino sa ulitawo nga kini usa ka abohon nga Nissan Altima 2.0. -- Sumpayan pa