Gula 99
Misanag ang bayhon ni Salie sa tumang kahinangop pagkakita niya kang Yuri nga nagtindog tungod sa pultahan. Wala gayod siya masayop nga ang ulitawo maoy nahiabot. Wala siya makasabot sa iyang kaugalingon mora’g midayak ang iyang kahiladman nga nakakita sa lalaki. Apan gipaninguha niya nga dili masabtan ni Yuri ang iyang gibati.
Gipasulod niya ang ulitawo ug gitanyagan og lingkoranan. Sa sala nag-atubang silang duha. Madasigon si Salie nga nakig-atubang sa ulitawo.
May gikuot si Yuri sa bolsa sa diyaket nga iyang gisul-ob. “Salie, diay akong gasa nga kinasingkasing kong ihatag kanimo. Hinaot ikalipay mo kini.”
Usa ka pungpong sa lab-as nga mga bulak ang gitunol ni Yuri ngadto sa dalaga. Peach ang kolor niini.
“Sus, kanindot ani, Yuri,” nahinangop ang dalaga. “Salamat, ha.”
“Di ba mao nay paborito mong kolor?”
Mitando ang dalaga. “Wa ka diay malimot?”
“Makalimtan ko pa ang pagginhawa apan dili kana,” sa ulitawo pa. Ug unya, human sa daklit nga kahilom, si Yuri miingon. “Mianhi ako aron pagsukna kanimo bahin sa akong pagpailob ug pagpaabot. Salie, kanus-a ka pa man motuo nako?”
“P-pasayloa ko, Yuri,” hinay ang pagpamulong ni Salie, may tuno sa kalumo. “Dili gayod nako madawat kanang imong gihalad kanako.”
Nahisagmuyo ang ulitawo, pormal kaayo ang nawong nga miatubang kaniya. “Gusto kong masayod, Salie, kun unsay hinungdan? Nganong giayran mo ang akong gugma?”
Mihugpa ang daklit nga kahilom. Si Salie lawom ang gihunahuna.
“Gusto kong daygan ko nimo sa tinud-anay, Salie,” matud ni Yuri nga misikdo sa pagtagad sa dalaga. “Wa ka ba makagusto nako? Sultihi ko.” -- Sumpayan pa