Dear Tita Salie,
Have a wonderful day. I hope that you are always happy. I know kun unsa kalisod ang pagpuyo sa kinabuhi nga dili kana happy. Kun dili kana happy wala kana’y gana nga molihok ug samot na nga wala kay gana motabang sa uban.
Just call me Daddy’s girl, am still single. My problem is about myself. Wala na ko’y kalipay ug wala na ko malingaw sa akong life, Tita. Ingon na niini ang dagan sa akong life sukad sa pagkamatay sa akong papa. Naguba gyod ang tanan nakong pangandoy sa kinabuhi. Wala na ko’y gana nga mabuhi tungod kay wala na man ko’y gana molihoklihok. Gusto na unta ko moapas sa akong papa niadtong pag-celebrate sa father’s day kay gibati man nako ang tumang kamingaw kaniya, Tita.
Bisan unsa na lang akong gibuhat aron malingaw ko ug aron mobalik ang akong gana sa kinabuhi. Apan bisan unsaon mopatigbabaw man gyod ang akong kamingaw sa akong amahan.
Suod man gud kaayo ming duha, Tita. Didto ko niya makasulti sa akong mga problema kay makasabot man siya nako. Wala koy gitago sa akong papa bisan unsa ka gamay sa mga nahitabo sa akong life akong i-share niya ug andam kaayo siyang maminaw, karon wala na ko’y kasultian sa tanan nakong gibati.
Unsa may akong buhaton, Tita? Palihog pasabta ko. Daghang salamat and more power. -- Daddy’s girl
* * *
Dear Daddy’s girl,
Ang kinabuhi sa tawo usa ka gasa gikan sa kahitas-an. Mao nga dili gyud nato kalimtan ang pagpasalamat tungod kay nakadawat kita sa maong gasa kay aduna man kita’y kinabuhi. Ug daghan kaayo kitang nadawat nga gasa nga kinabuhi pinaagi sa kinabuhi sa atong mga ginikanan. Gasa sila alang kanato tungod kay kun wala pa sila wala usab kita. Sa samang paagi, kita usab isip mga anak gasa usab alang sa atong mga ginikanan. Gihatag usab kita ngadto kanila.
Apan aduna kitay tagsatagsa ka kinabuhi nga atong puy-an. Ug ang kinabuhi nga atong gipuy-an dunay tagsatagsa ka kinutoban nga walay laing nasayod kun kanus-a kini mahuman kondili siya lang nga naghatag kanato niini ang Diyos. Ang Diyos ra ang nakahibalo kun kanus-a mahuman ang atong kinabuhi. Kun mahuman na kini ang tawo wala gyo’y mahimo gawas sa pagsunod sa iyang kabubot-on. Ug wala siya’y gitugon nga puydeng mokutlo sa kinabuhi. Ang magbuhat niini makahimo og dakong sala ug kinahanglan manubag kaniya.
Padayon sa kinabuhi, Daddy’s girl. Life must go on bisan kun wala na si papa. Anaa pa ang imong mama, mga ig-agaw ug paryente nga nanginahanglan kanimo. Kun mingawon ka ni papa iampo lang siya ug ingna nga tabangan ka aron mobalik ang imong kadasig sa kinabuhi. Puyde usab molangyaw ka una sa laing lugar aron ka malingaw. -- Tita Salie