Gula 6
Nabantayan ni Mindo nga mikurog ang abaga ni Liza human kini makadungog nga mipadayag na siya sa iyang gibati ngadto sa dalaga.
“Nahadlok ka ba nako Liz? Mora ka man gud og nangurog,” gipangutana ni Mindo ang dalaga. “Wala man ko mahadlok nimo, naglisud lang ko unsaon ka sa pagbalibad,” matud ni Liza.
Daw nasud-ipan si Mindo sa iyang nadungog. Sa iyang pagsabot nga balibaran siya ni Liza sa gihalad niyang gugma. “Nganong mobalibad ka man Liz, wala ka man kaha’y uyab?” sukot ni Mindo.
Nakalitan si Mindo kay gikusnit ni Liza ang iyang kilid. “Unsa man diay imong gusto, sugton ka diay dayon?” mingisi ang dalaga ug mibaiid sa ulitawo nga nag-agbay kaniya samtang sila padayong naglakaw.
“Sa ato pa sugton ko nimo Liz? Ay salamat!” napaisa ni Mindo ang iyang tingog sa kalipay. Nahimong mas sweet na kaayo sila nga nagsultihanay samtang naglakaw sa karsada.
Wala na kaayo’y mga sakyanan nga moagi kay nagkalawom na ang kagabhion.
Dili kaayo hayag ang karsada nga ilang gilakwan. Diha pa mabantayi ni Mindo nga nagsingabot na sila sa dapit nga nahimutangan sa tindahan nila ni Liza.
“Uy, mao na man diay kini ang inyong tindahan daplin sa karsada,” ni Mindo pa nga mihandum makadiyot sa panghitabo kaganinang buntag. Dinhi niya gipalukapa kadtong lima ka bugoy nga mibugal-bugal ni Liza.
“Mahimo ba og manglingkod usa kita sa tindahan Liz?” gihangyo ni Mindo ang dalaga. “Ikaw gud,” sa dalaga pa nga miuna sa pagsuong sa gamay’ng tindahan ug milingkod dayon siya sa lantay.
Misikit si Mindo paglingkod kang Liza. Dili na makasibog si Liza kay ang lantay adunay babag nga kawayan sa masi’g ka daplin. Giagbayan ni Mindo ang dalaga ug miginhawa siya’g lawom.
“Mahimo ba ako nga maka-kiss nimo Liz?” matud ni Mindo samtang gihapohap niya ang aping ni Liza sa iyang wala nga kamot. Wala motingog si Liza ug alang kang Mindo nagpasabot kini nga wala kini pagsupak nga iyang hagkan.
Lalim kaayo ang gibati ni Mindo nga sa unang higayon midapat ang iyang mga ngabil sa ngabil sa dalaga. Gigakus og hugot ni Mindo ang dalaga samtang giukoban niya pag-usab ang iyang mga ngabil.
“I love you Liz... I love you ‘sab Min.” (Sumpayan)