Gula 82
“Dili ko angay mauwaw sa maong hitabo kay wa koy sala nga nabuhat ngadto niya,” matud ni Angeline. “Siya’y angay mauwaw kay nagselos siya nga wa ibutang sa hustong lugar.”
“Unsa ba gyud diay ang nahitabo?” usisa ni Robert.
Gisuginlan ni Angeline si Robert sa tanan.
“Maayo gani kay wa ka mobawos sa pagpasakit niya nimo,” ni Robert.
“Dili ko sama niya ka-eskandalosa,” ni Angeline pa.
“Unsay gusto mo nga akong buhaton niya? Aron makabawos ka.”
“Ayaw na lang pag-apil-apil, Robert. Problema ra kini tali namo ni Almina. Di ko gustong manginlabot ang usa ka lalaki niini.”
“Gusto lang unta kong ipakita nimo nga andam kong manalipod ug molaban nimo sa tanang panahon.”
Wala motingog si Angeline. Pero iyang namatikdan nga dihay bahin sa iyang pagkatawo nga mora’g natukbil sa gisulti ni Robert.
Wala niya tuyoa nga nahitutok kang Robert. Unya nagkatagbo ang ilang mga mata. Nagkatinutokay sila. -- Sumpayan pa