Puwerting guola sa duha ka manghod ni Narda nga sila si Ana ug Nita dihang nag-text si lola nila Agustina nga patay na si Narda. Didto hipalgi ang patay’ng lawas niini ilawom sa usa ka imbornal. Gani, milang-og na man ang lawas niini kay banabana sa mga polis nga maoy miimbestigar sa nahitabo sa dalagang guwang tingali tulo na ka adlaw gikan sa pagpatay niini.
Naguhayguhay ang sinina niini ug wala na ang iyang underwear nga nagpaila nga kini gilugos unya human lugosa gipatay. Dunay daghang samad sa iyang lawas nga agi sa mahait nga punyal. Tungod niini, misaad ang hepe sa kapolisan sa ilang lungsod nga ila gyung paningkamotan nga makakuha sila’g impormasyon kun kinsay nakasaksi sa paghimo sa krimen.
“Hu, hu, hu, kaluoy sa among maguwang,” mihilak si Ana. “Kun di pa tungod ni ate Narda dili gyud me mahimong propesyonal, iya ming gigastohan sa pag-eskuyla, hu, hu, hu...”
“Kun si kinsa man ang nagbuhat niini, mahitabo ra unta kini sa igsuon niyang babaye o sa iya bang mga paryenteng mga babaye, hu, hu, hu,hu!” midanguyngoy usab sa paghilak si Nita. “Kapait sa gidangatan sa atong maguwang ate Ana, pait kaayo ang iyang kamatayon, hu, hu, hu, hu.”
Balig usa ka semana ang gidugayon sa haya ni Narda diha sa ilang balay. Matag gabii daghan gyud kaayong magbilar ug ang uban gani aron dili makatulog magduwa og tong-is, ug ang uban pang matang sa sugalsugal pinaagi sa baraha. Diha pud ang upat ka mga bugoy nga sila si Artemio, Kolas, Dario ug Simo. Gilla kini silang mga maldito ug mga bagis dinhi sa ilang balangay sa Santa Barbara. Wala’y mosukol ini nila kay dunay armas ug mga anak kini sila og sapian nga mga ginikanan.
Unya, pagka-katapusang gabii sa haya sa patay’ng lawas ni Narda kalit lang mibutho si Maning, ang uyab ni Narda. Kini gud si Narda dunay negosyo didto sa siyudad ug komboya silang duha ni Maning nga iyang uyab. Tungod niini, milambo ang ilang negosyo ug may plano pa gani silang magminyo na sa sunod bulan, apan unsaon man hikabsan man sa daotang palad si Narda. Mihilak ug midanguyngoy si Maning atubangan sa lungon sa iyang hinigugma.
“Sayod kung nia ra dinhi sa ato ang nagbuhat niini nimo, Narda, magbayad sila sa ilang gibuhat nimo!” nagpadayon pagdaligdig ang mga luha ni Maning.
Human ikalubong si Narda, mingaw na kaayo ang ilang balay kay sila si Nita ug Ana mibalik man sa siyudad kay tua man sila magtrabaho didto. Unya, usa ka hapon may nadawat silang text sa celpone nga makigkita kanila si manang nila Narda. Gibati’g kakuyaw ang duha ka manghod ni Narda. Nagtuo sila nga dunay nagbinuang kanila maong wala lang nila kini tagda kay uso na karon ang binuang sa cellphone nga text-text. Apan pagka tungang gabii didto sa ilang boarding house may nabati silang tingog sa wakwak.
“Ate, ate, Ana, may Wakwak, naa sa atop sa pantawan,” ni Nita pa nga mipukaw kang Ana. Tuod, mibangon si Ana ug ilang giduol ang dapit sa may pantawan. Wakkkk! Wakkk! Wakkkk! Kusog kaayo ang tingog sa wakwak.
“Hoy, wakwak, di mi mahadlok nimo. Kaingon namo’g didto lang sa baryo mangabat mong mga wakwak, hasta diay dinhi sa siyudad!” Naglagot si Ana. Human niya’g sulti kalit lang may mihagsa sa tugkaran ug gitawag silang duha.
“Ana! Nitaaa! Anaa! Nitaaa! dali mo, ako ni si ate ninyo Narda!!! niini pa nga nagbarog na didto sa may silong.
Aron pagsuta, nanganaog sila si Ana ug Nita. Tuod, maoy ilang nakita si ate nila Narda nga dakong buhi.
“Ate Narda buhi ka?” ni Ana. “Di ba patay ka na man?”
“Wala ako mamatay. Si Maning, siya ang nagbuhi nako. Tungod sa gahom sa iyang pagka-ungo, nabuhi ko. Ug karon sama kaniya usa na ko ka wakwak, he, he, he. Didto ko gikan sa atong baryo, ug akong gibalbal sila si Artemio ug iyang mga barkada, patay na silang upat! Ug ayaw gyud mo’g saba bahin ning inyong nasayran, ha, mga manghod nako?” Mipasidaan si Narda nga usa na ka mangtas.
Miyango ang duha ka manghod. Unya kalit lang milupad si Narda ug namulong, “ugma sa gabii, tua ko sa ato...” (Kataposan)