Gula 6
Mipahiyom si Nikki nga nakadungog nga gilitok ni Andro ang pulong I love you.
“Ka-express nimo Andro uy, kaganina pa gani nga buntag kita nagkaila imo man dayon ko nga gipanguyaban,” giingnan ni Nikki ang ulitawo.
Miduko si Andro ug naghuna-huna kun unsay itubag. “Sori kaayo Nikki, apan wala lang ko makapugong sa akong gibati nimo.” Nagpahiyom gihapon si Nikki nga nagsud-ong ni Andro.
Miduol ang waiter kanila nga nagdala sa gi-order nila nga pagkaon. Gitunol ni Andro ang kutsara ug tinidor ngadto sa dalaga. “Ka loving nimo Andro uy, tinuod g’yud nga dali ra kaayo ma-in love ang usa ka babaye nimo.”
“Unsay buot mo nga ipasabot? Sugton na ba ko nimo Nikki?” daw naghinam-hinam si Andro. Mihunong siya pag-usab sa iyang gikaon. “Unya na uy, mangaon man kaha ta,” ni Nikki pa.
Nanggawas sila si Andro ug Nikki. “Mamauli na ba ta Nikki?” gisukna ni Andro ang dalaga. “Gusto unta ko nga motan-aw sa kahimtang sa akong mga silingan sa dapit nga gigub-an sa among balay.”
Dali nga mipasirit si Andro sa motor. Nabantayan ni Andro nga migakus na si Nikki sa iyang hawak samtang nag-angkas sa motor. Dali ra silang miabot sa dapit nga gigub-an sa balay nilang Nikki.
Nakita sa dalaga nga nangligdas lang sa daplin sa karsada ang ilang mga silingan nga wala pa makakita og kapuy-an. Namangon sila sa pagkakita ni Nikki uban ni Andro.
Gihangop si Nikki sa iyang mga kanhi silingan.
“Dinhi ra ba kadto si Jeffrey day nangita kanimo kaganina. Gitug-anan nako nga ang naghatud sa inyong kargamento mao ang trak sa Insik mao nga didto nangutana ko asa kamo mobalhin,” matud sa usa ka hamtong babaye.
Igo lang miyango-yango si Nikki. “Dili na lang nato estoryahan si Jeffrey kay wala kadto’y kapuslanang tawhana… dili makatabang kun magkinahanglan ka og tabang,” matud ni Nikki.
“Swerte lang ko Nang Saling kay gikaila nako kini si Andro ug mitabang nako og ni Mama. Tua mi sa ilang balay sa barangay T. Padilla nagpuyo. Kun wala pa nako ikaila si Andro, sama unta ko ninyo nga dia sa karsada matulog,” dugang pamahayag ni Nikki nga migunit sa bukton ni Andro.
Wala sila magdugay si Andro ug Nikki, namauli sila sa T. Padilla. Apan mikalit pagtaligsik mao nga gipasirit ni Andro ang motor. “Adto usa ta sa taas Nikki, adto ta mag-estorya,” matud ni Andro pag-abot nila sa balay. (Sumpayan)