Gawas sa pagtuon, gigahinan usab niya’g oras ang pag-practice sa sayaw nila ni Robert alang sa PE subject niini. Hapit kada hapon silang magbansay sa gym sa ilang tulonghaan. Usahay magabhian siya’g pauli human sa practice nila ni Robert sa sayaw. Namatikdan ni Angeline nga nagsuod sila si Robert tungod sa kanunay nilang pag-practice og sayaw. Sa hilom nga pagpaniid ni Angeline, ingon sa mi-behave pag-ayo si Robert. Wala gyud kini mohisgot kaniya bahin sa gugma. Kaha, nahadlok kini nga mo-back out siya sa ilang sabot nga siya’y i-partner niini sa sayaw sa PE subject niini.
Dihang tulo na lang ka-adlaw ug mao na ang ilang midterm exam, gi-finalize na nila ni Angeline ug Robert ang sayaw nga ilang gipraktisan. Gabii na silang nakahuman og praktis.
“Ihatod tikaw sa imong boarding house,” hagad ni Robert.
“Ayaw na lang,” mibalibad siya. “Magsakay man ko’g traysikol. Ako nay bahala sa akong kaugalingon.”
Wala na mamugos si Robert. Miuna si Angeline paggawas sa gym kay may gipanghipos pa man si Robert.
Pag-abot niya sa main lobby, iyang nakita si Erik nga nagbarog didto sa gawas, tungod gayod sa exit. -- Sumpayan pa