Gula 62
Hinuon, gitago niya ang iyang gugma alang kang Erik. Pero wala na lang unta makigsuod si Erik ngadto kang Almina aron dili madugangan ang iyang kahimangod ug kasakit.
Pagka-palis, paggawas ni Angeline sa klase niya sa iyang major subject, midiretso siya sa library aron magpa-xerox sa libro sa iyang klasmet nga maoy gikuhaan sa gi-lecture sa ilang magtutudlo.
Apan pag-abot niya sa library, iyang natukmaan nga nagpunsisok ang mga estudyante nga nag-alirong sa nahimutangan sa xerox machine. Mibiya na lang siya sa library. Migawas siya sa school campus aron adto magpa-xerox sa gawas sa eskuylahan.
Dunay tindahan sa atbang sa eskuylahan nga nagtanyag og serbisyo sa xerox copying. Didto mopaingon si Angeline. Nagpa-xerox siya sa librong iyang dala. Ubay-ubay gyud ang mga panid niini nga iyang gipakopyahan.
Wala pa siya makahuman sa pagpaseroks, nakugang siya dihang kalit siyang giduol sa usa ka lalaki, si Robert!
“Kaganina ra kong nangita nimo,” ni Robert pa. “Nia ka ra man diay dinhi.” -- Sumpayan pa