Gula 58
Di ba ikaw man kadtong kauban ni Inspector Cuyos didto sa bakanteng lote?” ni Salie.
Miyango ang polis. Ug mipahiyom pa kini nga ingon sa nalipay nga nahinumdom pa si Salie kaniya. “Tana sa sulod, Ma’am. Kaganina pang nagpaabot si Sir kanimo.”
“Nalangan ko sa kahuot sa traffic.”
Miuna paglakaw si PO3 Juatco. Misunod si Salie. Pagsulod nila sa pultahan dihay usa ka polis nga mitimbaya kaniya. May gitunol kining usa ka pungpong sa puting rosas. Dili unta kini dawaton sa dalaga, apan pag-ingon sa polis nga masuko kanila ang ilang Sir, gidawat na lang niya ang mga bulak uban ang pahiyom.
Nagdrama ang kanahan, bagulbol niya sa hilom. Nahimuot siya sa hilom sa gihimo sa ulitawo.
Gitan-aw siya sa mga polis nga ilang nalabyan. Wala lang niya tagda ang ilang mga tinan-awan. Ang uban mitimbaya kaniya sa pagtawag og “Ma’am.” Mibalos siya sa pagpahiyom bisan og supak sa iyang kahiladman. Misantop sa iyang hunahuna nga nagtuo ang maong mga polis nga siya hinigugma sa ilang opisyal.
Wala madugay sa ilang paglakaw mihunong sila sa usa ka tinakpang lawak. Nanuktok si PO3 Juatco ug unya gibuksan niini ang pultahan. Gisenyasan siya niini sa pagsulod.
“Sir,” misaludo ang polis sa lalaki nga naglingkod atubangan sa usa ka malinis nga talad. “Ania na si Miss Valle.”
“Thank you, Juatco,” ni Chief Inspector Yuri Cuyos human mobalos pagsaludo sa iyang sakop. Ug mao nay iyang giatubang si Salie. “Have a seat, Miss Valle,” nagpangidlap sa kamasanagon ang mga mata sa ulitawo.
Miduol si Salie sa atubangan sa talad-buhatan ni Cuyos apan wala siya molingkod. Wala magtingog. Nakita niya ang pipila ka folder ibabaw sa talad sa inspector.
“Sir,” gikan ni PO3 Juatco,” may isugo ka pa ba nako?”
“Wa na, Juatco, ” tul-id nga tubag ni Inspector Cuyos. “Makagawas ka na.”
Misaludo ang polis kang Inspector Cuyos dayong gula. -- Sumpayan pa