Gula 57
Taudtaod nabati niya ang tingog ni Yuri sa pikas tumoy sa telepono.
“Good morning, Salie. Unsay ikaalagad ko kanimo?” Sukot dayon sa ulitawo. Maila nga wala kini magdahom nga motawag siya.
“Nakadawat ako’g mensahe gikan sa wa hiilhing tawo,” daling tubag sa dalaga. “Gusto kong ipakita kini kanimo. Tingalig magamit kini ninyong clue sa kaso ni Debbie Balatan. Kun dili makahasol kanimo, mahimo ba nga magkita ta?”
“Sure,” daling tubag sa ulitawo. “Asa kita magkita?”
“Moanha na lang ko sa presinto.”
“Ikaw ang mag-igo. Paaboton ko ikaw.”
Pagbutang ni Salie sa awditibo, dihadiha gisukot siya ni Vilma. “Unsay pu’ng sa imong gikasulti?”
“Moadto ko sa headquarters, Vil. Apan makigsulti una ko kang Editor Suarez.” Gibalik ni Salie pagsulod ang coupon bond ngadto sa brown envelope ug unya gipatong kini sa steel cabinet.
“Dili kuno moanhi si Sir karon,” matud ni Vilma. “Mitawag siya kaganina ug nagpahibalo nga misuol ang iyang arthritis. Hibawo ka na ning magkatiguwang na, daghang bation sa lawas.”
“Si Allan?”
“Wa pa sab mahiabot.”
Gipunit ni Salie ang brown envelope ug uban niyang dad-onon. Nananghid siya kang Vilma nga molakaw. “Ikaw nay maantigong mopasabot kang Allan kun mangita siya nako. Di na lang ko maghulat niya.”
Miyango si Vilma. “Pag-amping sa imong kaugalingon.”
“Salamat.” Ug dayon mitalikod si Salie. Sa atubangan sa Police Headquarters gipahunong ni Salie ang iyang gisakyan. Pasado alas diyes na niadtong tungora. Nanaog siya human mapalong ang makina sa sakyanan.
Usa ka polis nga yagpison og lawas ang misugat kaniya. Mihatag kini’g katahoran kaniya nga iya usab nga gibalosan. Nagpaila ang alagad sa balaod nga si PO3 Roland Juatco. -- Sumpayan pa