Gula 55
Milingkod si Salie sa swivel chair luyo sa iyang talad-buhatan. Gibuksan niya ang envelope. Gihulbot ang sulod niini nga usa ka coupon bond. Ug nanagko ang iyang mga mata sa iyang nakita.
Wala’y laing sulod ang brown envelope gawas niadtong usa ka coupon bond nga gihulbot ni Salie. May mga ginunting nga mga letra gikan sa usa ka magasin nga gipapilit niini. Ang maong mga letra mitibuok og mga pulong. Mitadlas ang pipila ka kunot sa agtang sa dalaga samtang nagtutok sa papel. Mibati siya’g kahibulong.
“O, unsa na? Bomba ba kana?” pakisusi ni Vilma dihang nakita siya nga wala makalihok. Mihunong kini sa pag-computer, mitindog ug miduol sa iyang gilingkoran. Mikunot usab ang agtang niini pagkakita sa sulod sa envelope nga usa ka papel nga gipapitlan sa mga cut out letters.
“Unsa kahay tumong sa naghatag niana kanimo?” nakaingon si Vilma. “Nganong wa man lang niya kana sulata sa kinamot o kaha gi-type.”
Gisenyasan ni Salie si Vilma sa paghilom. Nakasabot si Vilma nga dili gusto ang dalaga nga makamatikod sa ilang kalangas ang uban nilang mga kauban sa buhatan.
Gibasa nila sa hilom ang mensahe nga gimugna sa tinabas nga mga letra: Ikaw Ang Rayna Sa Akong Kasingkasing.
Nagkatinan-away ang duha ka dalaga.
“Unsa kahay buot ipasabot niini?” Nangutana si Vilma nga kalit gikulbaan.
Wala’y tubag. Miduko si Salie, nagpalandong. Unya kalit siyang miyanghag kang Vilma, mihana pagbuka ang baba nga kasultihon.
“A-ang misteryosong tawo...”
“Ang misteryosong caller nimo? Nganon man diay siya?”
“Lagmit nga siya ang nagpadala niini.”
“Ha?” nakugang si Vilma.
“Nahinumdom ko,” ni Salie pa. “May barahang queen nga gibutang sa patay’ng lawas sa babaye nga among nakit-an didto sa bakanteng lote. Heart ang buwak.” -- Sumpayan pa