Ang kalibog ni Angeline nadugangan paglabay sa tulo ka adlaw. Gabii kadto ug si Angeline migawas sa iyang boarding house aron mopalit og tambal sa labad sa ulo alang kang Vera.
Sa usa ka pharmacy nga nahimutang tupad sa Aroma lodge, didto si Angeline mipalit og tambal sa labad sa ulo. Samtang siya nagpaabot sa iyang sukli, nakabig ang iyang pagtagad sa lalaki ug babaye nga mao pay paggawas gikan sa Aroma Lodge. Ang ilang kalangas maoy nakabitad sa iyang atensiyon.
Apan nakugang si Angeline dihang iyang nasuta nga si Almina ang maong babaye. Ang lalaki nga kauban niini mao gihapon kadtong lalaki nga kuyog niini nga nakita ni Angeline didto sa ICM.
Midali si Angeline pagtalikod samtang wala pa makaalinggat si Almina kaniya. Sila si Almina nanakay dayon og traysikol. Dihang nakabiya na ang traysikol nga ilang gisakyan, nakapanglingo si Angeline.
Pagka ugma, human sa ikaduhang klase ni Angeline sa iyang mga subject sa buntag, giatangan siya ni Almina sa iyang paggawas sa classroom. Gusto nga makigsulti si Almina kaniya. -- Sumpayan pa