Maayong adlaw usa ko sa liboan nga tigbasahan og Banat News. Ganahan kaayo ko mobasa sa inyong mga sugilanon ug mga article. Mao ra gyud kini ang akong kalingawan samtang nag-duty ko sa akong gitrabahoan.
Tagoa lang ko sa pangalan nga Revelo, taga Negros, apan nia ko dinhi sa Cebu kay dinhi man ko makakita og trabaho. Usa ko ka security guard. Minimum lang ang akong suweldo, gusto unta ko mangita og lain nga agency kanang taastaas og suweldo kay nagkamahal na man karon ang mga palitonon.
Busa nipasa ko og resignation letter ngadto sa among agency. Tulo ka tuig na ko nga nagserbisyo isip usa ka security guard. Seguro gi-process na nila ang akong release. Apan matud nila nga ang cash bond ra kuno ang ilang ikahatag kanako sa akong pag-resign ug wala nay lain.
Dili ba diay sila obligado mohatag kanako og separation fee nga three years man ko nga nagserbisyo sa ilang agency, Tita?
Hinaot unta nga imo kong mapasabot kay naglibog gyud ko. Thank you very much and more power.
* * *
Maayong adlaw, Revelo,
Dili ka gyud maka-demand sa imong agency sa imong giingon nga separation fee o pabalon sa imong paghawa gikan kanila. Tungod kay boluntaryo ka man nga mipahawa.
Dili nimo sila magukod kun igo ka lang nilang hatagan sa cash bond bisan pa man kun dugay-dugay ka nga nagserbisyo under sa ilang agency. Pilit nimo kining dawaton nga ingon niini ang atong sistema.
Ang empleyado bisan dugay na siyang nagserbisyo apan boluntaryo o siya gyud mismo ang niundang sa iyang trabaho dili gyud maka-demand o makapugos nga mahatagan og separation fee. -- Tita Salie