Gula 37
Sila si Salie ug Allan nanggawas sa publikasyon nianang ligas sa kaudtohon. Didto sila paingon sa SM City Cebu. Nanulod sila sa usa ka outlet sa Jollibee ug nangaon.
“Nasayod na ko kun unsay ihatag ko kanimo nga imong magustohan,” ni Allan nga nagtan-aw sa dalaga nga mituslob sa french fries sa ketchup. “French fries.”
Mipahiyom ang dalaga. “Paborito ko kini.” Ug mipadayon siya pagkaon.
Si Allan mitibawas usab sa pagkaon. Wala sila’y tingogtingog. Si Salie hilabihan nga nakakaon sa french fries.
“Allan, dugaydugay na kitang nag-uban,” mibuak sa kahilom si Salie pagkataudtaud, “apan hangtod karon wa ka pay gisulti kanako bahin sa imong kinabuhi. Nailhan ko lang ikaw isip usa ka potograpo kutob ra diha.”
Nahikatawa si Allan. “Dili interesting ang akong kinabuhi. Dili nindot og sugilanon. Tingalig laayan ka lang kun ako kang suginlan.”
“Suginli lang gud ko,” sa dalaga pa sa kamatinud-anon, “aron may diyotay sab kong masayran nga background sa imong pagkatawo.”
Mipitokpitok ang mga mata ni Allan. Gitutokan niya si Salie. Wala’y gisulti. Unya miduko. Pagkataudtaod miyanghag ug miyanguyango nga miatubang ngadto sa dalaga nga pormal kaayo ang nawong.
“Puya pa ako nga gibilin sa tinuod kong inahan sa balay-sagopanan,” misugod pagsugilon si Allan.
Gisagop siya sa adunahang magtiayon nga wala’y anak. Giisip siya nga tinuod gayod nga anak sa magtiayon. Gipadako ug gipaeskuyla siya.
Hayiskol na siya sa dihang namatay si Mama niya Corazon sa sakit nga kanser. Paglabay sa tulo ka tuig naminyo pag-usab ang iyang papa Ludivico. Buotan ang iyang tiya Anita. Apan dili gayod kini sama kamasinaboton sa iyang mama Corazon. -- Sumpayan pa