Gula 1
Gikan sa trabaho, mihapit si Ronald sa Taboan Public Market kay gusto siya nga mopalit og buwad nokus ug danggit. Paborito kini kaayo ni Ronald.
Giparking ni Ronald ang iyang motorsiklo daplin sa dalan Tres de Abril ug misulod siya sa dried fish section. Giduol niya kadtong natipun-og nga danggit-pinikas nga may pagka labtingaw pa.
Mipalit si Ronald og usa ka kilo. Gilabyog niya ang iyang panan-aw sa unahan ug nasigpatan niya ang gwapa nga babaye nga nagbantay sa baligya nga mga buwad.
“Nokus sir, six hundred ra ang kilo,” nagpahiyom ang babaye kang Ronald. Giduol ni Ronald ang babaye. Gitan-aw ni Ronald ang buwad-nokus ug nasuta niya nga bag-o pa ang maong mga buwad.
“Pwede five hundred fifty lang Miss kay mopalit ko’g usa ka kilo,” gipahiyoman ni Ronald ang babaye. Milingi ang babaye ug dayon sa hinay’ng tingog miingon “Sige, pero og naay mangutana ingna nga six hundred ha?”
Gikalipay ni Ronald kay gipakapinan pa gani siya. Human kabayri ni Ronald ang iyang gipalit, wala dayon siya milakaw. Nagkalingaw usa sila og sultihanay.
“Ako diay si Ronald,” matud ni Ronald nga mitunol sa iyang kamot ngadto sa babaye. Mipahiyom ang babaye nga midawat sa kamot ni Ronald. “Jenny ang akong ngalan.”
Diha pa mahibaw-i ni Ronald nga anak diay si Jenny sa tag-iya sa tindahan ug taga isla sa Botigues nga sakop sa Bantayan Islands. Nagtungha si Jenny pagka nurse sa Cebu City Medical Center ug sa gabii motabang pagpaninda.
“Kanindot diay bakasyonan sa inyong lugar Jenny,” giingnan ni Ronald ang dalaga. “Para sa naanad dinhi sa siyudad ganahan g’yud didto apan usahay abton ka ra usab og kamingaw,” matud ni Jenny.
Mitukar dayon ang kaabtik ni Ronald nga mohimo’g bulatik sa mga babaye. “Kun ikaw lang ang akong kauban kanunay, dili g’yud ko abton og kapuol ug kamingaw.”
“Gikan sa among isla, makita kaayo ang Cebu mainland mao nga kadtong taga dinhi nga moadto didto, abuton g’yud og kamingaw,” ni Jenny pa. Nagbayloay sila’g contact numbers ug didto nagsugod ang ilang panagsuod.
Kanunay na sila nga magpadad-anay og mga mensahe. Usa ka higayon nagkita sila si Jenny ug Ronald sa usa ka department store sa downtown. Gipahimuslan ni Ronald ang higayon ug iyang giimbitar og snacks ang dalaga. – (Sumpayan)