Mibanagbanag na sa paghiabot ni Angeline sa ilang pinuy-anan sa lungsod sa Danao. Nagmingaw pa ang palibot sa ilang balay. Gisangpit dayon niya ang iyang mga ginikanan.
Naabli ang pultahan. Nakugang ang iyang amahan pagkakita kaniya. Gitawag dayon niini ang iyang inahan ug gipahibalo sa iyang pag-abot. Sa nakasulod na siya sa balay, gitug-anan niya ang iyang mga ginikanan sa hinungdan sa kalit niyang pagpauli.
“Satanas diay kadtong nagpaka-Diosnon nga Amerikano,” nagkanayon ang amahan ni Angeline nga nasuko pag-ayo.
“Isumbong ta siya sa mga polis,” matud pa usab sa iyang inahan.
“Ayaw na lang, Tay, Nay,” giingnan sila ni Angeline. “Wa man sab siya molampos sa iyang tuyo nako. Ang mahinungdanon nga wa ko madisgrasya. Di na lang ta mokiha kay samok na.”
Mihilom na lang ang iyang mga ginikanan.
Sukad niadto wala na gayod mopakita si Walter Toews sa ilang dapit aron pag-conduct og Bible study.
Tungod sa maong hitabo ingon sa nawad-an og paglaom si Angeline nga makatungha sa kolehiyo. -- Sumpayan pa