Gikan si Terio nga misimba sa Basilica del Santo Niño ug samtang siya naglakaw sa usa ka videokehan sa dalan Manalili kay moadto unta siya sa Colon, nadungog niya nga gikanta ang kinaham niyang awit – ang Hopelessly Devoted To You.
Matag kadungog ni Terio niining maong awit mahinumdom g’yud siya sa kauban niya sa trabaho kaniadto nga si Welyn, kinsa maayo kaayo nga mosundog sa tingog ug estelo sa pagkanta ni Olivia Newton John.
Ang kamaayo mokanta ni Welyn sa maong awit maoy sinugdanan nga miturok kang Terio ang usa ka pagbati. Ang ilang kasuod milipang ug nakagambalay og relasyon tali kanila.
Apan naputol kini kay milangyaw si Welyn sa laing nasud human mi-resign sa iyang gitrabahoan. Kun mabati ni Terio ang maong awit nga Hopelessly Devoted To You, takulahaw lang nga mahandom niya si Welyn.
Mibalik si Terio sa nalabyan na unta niya nga videokehan. Nagpasumangil siya nga miorder og pagkaon aron maaninaw niya kun kinsa ang mikanta sa kinaham niyang awit.
Gikulbaan si Terio kay ang babaye nga nagkanta sa kinaham niyang awit susama gayud og pamayhon ni Welyn. Takulahaw lang nga nabanhaw ang pagbati nga namatay na unta alang kang Welyn.
Apan dili si Welyn ang mikanta. Nanghupaw si Terio sa hilom. Human og kanta sa babaye, wala makapugong si Terio sa pagpakpak agi og pagyukbo ngadto sa babaye.
Milingi ang babaye kang Terio ug mipahiyom. May kauban usab kini nga laing babaye nga nangaon. “Usbi’g kanta miss ako’y bayad,” matud ni Terio ngadto sa babaye nga mipahiyom sa pagkadungog sa iyang gisulti.
“Maantigo ka sa awit ni Mary MacGregor? Kadto gani nga Torn Between Two Lovers?” giingnan ni Terio ang babaye nga diha sa sunod lamesa nga iyang gilingkoran.
“Atong suwayan og maantigo ba ko ana,” mipahiyom ang babaye. Gitawag ni Terio ang waiter ug giawhag nga ipatugtog sa videoke ang maong awit.
Wala g’yud mosipyat si Terio. Wala maanugon ang iyang gibayad kay hilabihan kanindot nga mikanta sa babaye sa Torn Between Two Lovers. “Can I join with you in your table?” nagpahiyom si Terio.
“Sure, dali. Hilig usab diay ka’g kanta ilabi na ang mga standard?” matud sa babaye. Mao na ang akong gusto nga mga kanta kay puno sa kahulogan ang iyang mga lyrics. (Sumpayan)