Gula 5
“Asa ka na man?” ni Rose pagkamatikod niini nga mitindog na si Pepe.
“Kaon lang mo’g inyo,” ni Pepe nga mipaturatoy og lakaw paingon sa sala.
“Mosimba ra ba kita karon,” paagpas ni Rose.
“Ngano man gud diay’g mosimba? Ayaw mo’g langanlangan kay basin dili na kita makaabot sa misa ni Padre Giovani.”
Nahimong suliran sa magtiayong Pepe-Rose ang kamagulangan nilang anak nga si Ramil. Sa tulo nila ka anak, si Ramil ang labing masupilon. Dili maminaw og tambag. Bisan unsaon niya’g sermon, nagpabilin kining bato. Mikubol. Kun unsa ang gusto, mao gayoy tumanon. Dili magpabadlong. Dili magpapugong nilang mga ginikanan.
Wala’y problema silang magtiayon sa duha nila ka anak--si Che-che ug si Joel. Pulos buotan ug masinugtanon kanilang mga ginikanan ang duha. Managsama silang nagtungha sa hayiskol, lainlain og ang-ang. Si Ramil nga ila untang gipa-eskuyla sa kolehiyo sa siyudad maoy nahungog. Nayabag sa barkada ug gipasagdan ang pagtuon. Gipalabi niini ang hugoyhugoy. Wala makapasar bisan usa ka subject sa ilang tunghaan. Mao nga nakahukom silang magtiayon nga paundangon na lang kini sa pagtungha. Anugon ang salapi nga gastohon alang sa anak nga dili magtarong sa pag-eskuyla. -- Sumpayan pa