Wala na gayo’y timik si kumander Turo. Ang kahilom niini ikatandi sa ulay nga lasang sa Kaandis sa wala pa niya mataak. Iyang namatikdan nga nakig-tinan-away kini sa duha niini ka mga kauban. Daw nagsultihanay sila sa pinulongan sa balatian.
“Nakasabot ako sa imong bahin, Gener,” sa kumander pa nga nahisama sa abogado nga napilde sa kaso. “Apan wala pa gihapon namo tak-opi ang among pultahan alang kanimo. Sa higayon nga mobali ang hangin sa imong hunahuna, andam ang among pundok sa kanunay pagdawat kanimo.”
“Daghang salamat,” mao ray iyang nalitok.
Nakiglamano siya sa pangulo sa mga rebelde.
“Kun magkinahanglan ka kanamo,” sa kumander pa, “nasayod ka na kun asa mo kami pangitaa.”
Sa nakalakaw na ang tulo ka rebelde, milingkod siya sa hagdanan sa payag. Ang iyang hunahuna mora’g gisuyop sa huyonghuyong.
Sa hilom wala niya ikalipay ang paghiabot sa pundok ni Kumander Turo sa bukid sa Kaandis. Ang iyang kabubut-on nagtinguha nga masolo ang maong kalibotan. Miungot ang lakad nga kahingawa sa iyang hunahuna. Kahingawa nga milubad ngadto sa kahasol nga maoy uyok sa iyang kabalaka.
Misantop sa iyang kahimungawong ang hinungdan nga nahiabot ang mga rebelde sa bukid sa Kaandis. Natultolan sa mga sakop sa militar ang ilang kuta sa bukid sa Kabangbang. Gisulong sila sa kasundalohan. Naapiki sa pagsukol maong miikyas. Midangop sa bukid sa Kaandis kay nagtuong luwas na sila gikan sa mga gaway sa kagamhanan nga migukod kanila.
Pero lahi ang pangagpas nga iyang nasangkad sa tumoy sa hitabo. Nagtuo siyang dili lung-an sa kasundalohan paggukod ang pundok ni kumander Turo. May katahap siyang posible nga gisundan na pagsubay sa militar ang mga ilhanan sa ilang pag-ikyas. Dali ra silang matimahoan dinhi sa bukid sa Kaandis. Kun nasimhotan ilang kuta sa bukid sa Kabangbang nga nahimutang sa labing tago nga dapit, mas sayon silang tultolon sa ilang gilubloban niining bukid nga ilang gidangpan. -- Sumpayan pa