Gula 55
Gipadayon niya ang iyang gibuhat. Tugob sa kadasig ug kakugi niyang gihawanan ang maong dapit aron makatagbaw na sa pagtubo ang lubi.
Palis na siyang mibalik sa payag nga iyang gipuy-an. Apan nakugang siya sa iyang paghimuntog sa tugkaran sa payag. Iyang natukmaan ang tulo ka tawo diha sa may tugkaran, ang usa naglingkod sa hagdanan. Nahasibog siya nga nahikuratan. Mihana siya pagbalik sa iyang agi.
“Ayaw kahadlok,” dihay tingog nga mihupay sa nag-aliwaros niyang kahiladman nga gikuligaw sa kabalisa.
Sinati niya ang maong tingog. Mihunong siya. Mitan-aw ngadto sa nagsulti. Pero misamot ang iyang kahikugang sa nakaila na sa tulo ka mga dumuduong. Sila si Kumander Turo, ka Igme ug ka Inday nga nahitapnas sa tugkaran sa iyang payag. Pulos sila nagsul-ob og kalo nga gipayungyong ang paldiyas hinungdan nga wala dayon siya makaila kanila.
“Wa ko magdahom nga mag-abot kita dinhing dapita, Gener,” nagkanayon si Kumander Turo.
“I-ingon man usab ako, Kumander,” niya pa. “Pero nganong nahiabot man kamo niining dapita?”
Wala’y tubag gikan sa gipangutana. Ang Kumander milantaw ngadto sa unahan. Namatikdan ni Gener nga mihun-ag ang bug-at nga kasub-anan sa panagway sa pangulo sa mga rebelde.
“Unsa man diay nahitabo, kumander?” niya pa.
Miatubang kaniya si Kumander Turo. May kaligdong nga misihag sa panagway sa lider sa mga walhon. Ubay sa kaluya ang sinultihan niini.
“Gisulong kami kagahapon sa mga sundalo sa kagamhanan,” sa kumander nga ingon sa gikumhan sa kahisagmuyo ang kaugalingon.
“U-unsa?” mao ray nalitok sa iyang dila.
“Natultolan na gayod nila ang among kuta,” gikan na usab sa pangulo sa mga rebelde. “Kagahapon gisilhig sa duha ka helikopter sa militar ang dapit nga among gilubloban. Ubay-ubay sa akong mga sakop ang nakabsan sa kinabuhi. Daghan ang mga samdan. Nagkatibulaa’g kami sa pagpanagan aron paglikay sa dugang pang kadaot. Wala ko’y kasayoran kun hain ang uban modangop. Pipila lang ang nahikuyog kanako. -- Sumpayan pa