Nakahukom si Oscar nga mopauli sa ilang dapit sa probinsya human aprobahi ang iyang 15 ka adlaw nga vacation leave. Gikan sa Enero wala g’yud siya mo-leave sa trabaho kay daan na niyang tinguha nga adto mamasko sa probinsya.
Mga alas kwatro sa hapon didto na si Oscar sa ilang dapit sa barangay Anonang Norte, usa ka barangay nga sakop sa Bogo nga bag-o lang nahimo nga ciudad.
“Tukma kaayo ang imong pag-abut gaw kay dunay bayle karong gabii diha sa tennis court sa baryo,” matud sa ig-agaw ni Oscar nga si Jimmy. “Daghan na ra ba kaayo ron og mga gwapa dinhi sa ato gaw,” timang ni Dario nga laing ig-agaw ni Oscar. “Sige mangadto ta unya, maglingaw-lingaw ta dinhi kay duha ka semana ang akong leave,” dali nga tubag ni Oscar. Daku og sweldo si Oscar sa gitrabahoan niya nga kompaniya mao nga igo-igo g’yud ang kwarta nga iyang gibawon sa paglulinghayaw ning paskoha.
Nagsugod na ang kalingawan pag-abot sa tulo ka mag-agaw didto sa baylehan. Didto usa sila mitindog daplin sa baylehan ug maoy gipuntariya sa ilang mga mata ang mga dalaga nga naglaray pagpanglingkud sa lingkoranan nga nagpaabot nga sayawan.
Lahi dinhi sa ciudad nga gubot kaayo kun dunay disco, didto sa probinsya manglingkud ang mga dalaga nga magpaabot nga kuhaon sila sa mga lalaki aron pakigsayawan.
“Wala tuod mo masayop da, daghang gwapa nga nanayaw rong gabhiona,” matud ni Oscar. Taud-taud, mihimo’g announcement ang emcee sa kalingawan.
“Mga higala, garbo nato nga karong gabhiona uban kanato ang usa nato ka igsuon dinhi sa barangay nga sa taud-taud nga panahon wala na kanato magpakita! Ato nga hangpon si bay Oscar Flores!”
Nakalitan si Oscar, apan wala siya’y laing nahimo gawas sa pagkaway-kaway sa iyang kamot. Nahimo siya nga sentro sa panan-aw sa mga tawo niadtong gabhiona. Daghan ang miduol kaniya, ang uban wala na dayon niya mailhi kun wala magpaila.
Nahimong Santa Claus si Oscar niadtong gabhiona. Gibangkahan niya’g inom ang iyang mga higala ug siya ang mibayad sa kitaon unta sa bayle aron libre na ang tanang sonata alang sa tanan.
Sa laktud, nahimong sikat kaayo si Oscar sa maong baylehan. Dunay nakadani sa iyang panan-aw, usa ka maanyag nga babaye nga kaganina ra niya nga gisunod-sunod pagtan-aw. (Sumpayan)