Gula 6
Alas singko na sa hapon nga nanggawas sila si Rey ug Jane sa motel nga ilang gisudlan. Mideritso sila sa usa ka kan-anan diha sa Juan Luna Avenue atbang sa usa ka seminaryo.
Human sa ilang pagpangaon. “Jane duna ka bay cellphone? Mangayo ko sa imong contact number,” ni Rey pa nga paraygon kaayo’g tinan-awan ngadto sa dalaga.
Mipahiyom si Jane, wala dayon motubag. “Sagdi lang, moadto ra unya ko balik sa estasyon. Apan ayaw kalimot nga kanunay ko nga maminaw sa imong programa matag gabii.”
Alang ni Rey, talagsaon g’yud nga pagkababaye si Jane. Wala kini magpanuko pagtugyan kang Rey sa iyang pagka-babaye apan dili mohatag sa iyang contact numbers.
Nagpahatud si Jane didto sa SM ug didto sila nagkabuwag. Mibalik si Rey sa estasyon nga iyang gitrabahoan. Nasugatan ni Rey ang iyang manager nga paingon na nga mopauli.
“Kumusta na kadtong imong gi-follow up Dong, okay na? Gwapa ra ba to da mao nga diha nako gi-assign nimo kay buotan ka, dili ka mapahimuslanon,” matud sa manager.
Mipahiyom si Rey. “Okay na sir, giubanan nako pagpa-blotter sa T. Padilla police station.”
Nanglabay ang mga adlaw, dayon mga semana. Gibati ni Rey ang kamingaw kang Jane. Nag-andam siya sa mga pinili niya nga awit nga ipatugtog sa iyang programa inigka-gabii.
May gipangita siya nga music nga ipahinungod niya kang Jane. Duha ka awit ang iyang ipahinungod sa iyang namingawan.
Pagka gabii na atul sa iyang programa.
“Buksan nato ang atong programa karong gabhiona pinaagi sa duha ka awit … awit ni Julio Eglesias nga nag-ulohan og Hey, ingon man ang Just Tell Me You Love Me…. kinasing-kasing ko kining ipahinungod kang Jane. Daw wala makasabot si Rey sa iyang gibati karong gabhiona. Ingon sa gihakop og tumang kamingaw ang iyang kasing-kasing kang Jane nga nahimamat niya makausa pa lang nga higayon.
Taud-taud, gitawag si Rey sa technician. “Makig-estorya nimo na Rey, dili g’yud magpabalibad.”
“Kumusta ka Rey? I miss you,” nakaila dayon si Rey sa maong tingog…iya kini kang Jane. Daw naglumpayat ang iyang kasing-kasing ug wala kapugngi nga nakasinggit.
“Jane! Asa ka na karon? Mingaw na kaayo ko nimo!” ni Rey pa. Nakalimtan ni Rey nga duna pa diay siya’y programa. “Last commercial na ning akong gitira Rey,” matud sa technician.
“Bye Jane. Tawag balik ha?” Mibalik si Rey sa announcer’s booth. “Good evening ni Jane nga naminaw g’yud diay sa atong programa karong gabhiona.” (Sumpayan)