Gula 75
Ang feeling ni Danica mao nga palaran kaayo siya. Ang nakalabay nga pipila ka adlaw nga panag-uban nila ni Jeffrey ning hilit nga dapit sa bukid giisip niyang usa ka matahom nga kasinatian. Malipayon siya sa ilang panag-uban.
Alang kang Danica, silang duha si Jeffrey wala’y kalainan nilang Adan ug Eba sa paraiso. Bisan tuod nga managsama silang may problemang giatubang apan ila kining mahikalimtan sa makadiyot sa mga limbatianong higayon sa ilang panagsulti. Wala na niya isipa si Jeffrey nga laing tawo sa iyang kinabuhi.
Alang kaniya, kabahin na si Jeffrey sa bag-o niyang kalibotan. Si Jeffrey ang iyang katambayayong sa iyang pagpakigbisog karon.
Mihaw-as na si Jeffrey gikan sa tinubdan. Gipakaingon ni Danica nga nag-brief lang kini samtang naligo. Nagsul-ob diay kini og shorts nga pang-sports. Mipaingon kini sa iyang nahimutangan.
Karon pa niya masuta nga maayo diay og lalik ang lawas ni Jeffrey. Lalaki gayod kaayo kini’g barog. Wala niya kalikayi ang pagpasiplat sa balhiboon kaayong dughan niini.
“Hi,” timbaya ni Jeffrey. “Good morning.”
“G-good morning,” mibalos siya pagtimbaya.
“Kumosta ka na?”
“M-maayo na ang pamatyag ko sa akong lawas.”
“Maayo hinuon kun mao kana. Layo ra ba kita sa doktor dinhi.” -- Sumpayan pa