Dear Tita Salie,
Maayong adlaw ug kumosta? Ganahan kaayo ko magsige og basa sa imong column, Tita. Kada-adlaw ako gyud kining gibuhat. Lingaw-lingaw lang apan daghan kaayo ko ug makat-onan.
Duna koy kapuyo nga usa ka minyo. Duna siya’y unom ka mga anak sa iyang matuod nga asawa. Ug hangtod karon magsige lang gihapon sila og kita niini. Dili gyud ko kapugong kaniya kun magkita sila kay magtiayon man sila nga tinuoray pero nagkabulag lang sila. Pero mobisita man ang akong kapuyo ngadto sa iyang mga anak busa magkita gyud sila. Sakitan unta ko, Tita, apan wala gyud ko’y mahimo.
Duna sad mi tulo ka mga anak. Pinangga niya ang mga bata, ug wala ko’y problema kabahin niini kay wala man niya kini pasagdi.
Duna ko’y nauyab karon, Tita, nga usa ka ulitawo, og wala’y kabilinggan. Nagminahalay mi pag-ayo. Ug matud niya nga madawat niya ang akong pagkatawo, kay wala man ko’y gitago kaniya. Andam niyang dawaton hasta ang akong mga anak.
Ako na kahang biyaan ang akong kapuyo, Tita, kay minyo man siya ug dili gyud siya maako? Palihog pasabta ko ug tabangi ko sa angay nakong buhaton because I really need your advice. Thank you and take good care.
* * *
Maayong adlaw. Bisan unsaon nimo dili gyud siya maimo sa hingpit kay minyo man kanang amahan sa imong anak. Busa kun gusto ka og hapsay nga pagpuyo og makabaton og tinuod nga pamilya, hangyoa ang imong kapuyo nga undangon na ninyo ang inyong relasyon total duna man siya’y matuod nga pamilya. Hangyoa na lang siya nga balikan ang iyang matuod nga asawa.
Kun makagawas kana nianang sitwasyona ayaw kalimot pasabta gyud ang imong mga anak. Sultihi sila sa tinuod nga nahitabo sa inyong kinabuhi. Ug mahitungod nianang imong bag-ong uyab nga usa ka ulitawo, siguradoha gyud nga madawat niya ang imong kahimtang nga duna kanay mga anak. Kay mas mosamot gyud ang imong problema kun ikaw lang ang iyang mahalon ug lisod niyang dawaton ang imong mga anak.
Tan-awa pag-ayo ang iyang batasan, gamita ang imong hunahuna ug dili ang imo lamang kasingkasing, aron imong makita ang pagkatawo nianang tawhana. Hunahunaa nga anaa kay mga anak nga labaw’ng mag-antos kun magkaproblema unya ang inyong pagpuyo. -- Tita Salie