Gula 94
Wala makatingog si Colleen. Wala siya magdahom nga mao kini sangkoan sa panagsulti nila ni Brendan niining higayona.
Giayo si Colleen sa pagpasabot ni Brendan. Ingon sa nahan-ay nang daan sa ulitawo ang tanan niining buot isulti kaniya.
“Nagtuo kong dili kini sakit alang kanimo, Colleen,” ni Brendan pa, “bisan giatol ko kini sa imong birthday. I think it’s the best birthday gift nga imong nadawat karong adlawa.”
Nakasabot si Colleen sa mga punto ni Brendan. Husto ang ulitawo. Dili kinahanglang lisodlisuron pa nila ang ilang kaugalingon pinaagi sa usa ka relasyon nga wala’y klaro. Mao nga gidawat niya ang pagpakigbuwag ni Brendan kaniya. Alang kaniya, dili kini insulto sa iyang pagka-babaye. Hinuon mora siya’g naibtan og tunok. Mora’g nahuwasan gikan sa usa ka taas nga hilanat.
“Salamat sa paghatag mo kanako’g higayon nga maka-uyab nimo,” ni Brendan nga mitunol sa kamot niini kaniya alang sa pakiglamano.
“Salamat usab sa imong pagsabot kanako,” ni Colleen nga midawat sa binukhad nga palad sa ulitawo. “I-I’m sorry, Brendan, pero...”
“I wish you all the luck, Colleen,” ni Brendan pa.
“Ikaw sab,” ni Colleen. “Hinaot nga makaplagan mo ang babaye nga mao gyu’y angay sa imong paghigugma. -- Sumpayan pa