Gula 2
Lingaw kaayo ang mga customers sa Wild Orchids Bar bisan og ang mga dancer niini dili sama sa uban nga magpakita sa pribadong parte sa ilang lawas.
Bisan ang news reporter nga si Philipp Cerojano nga misulod sa maong bar nakadayeg sa kalainan sa Wild Orchids Bar kay sa ubang mga bar nga ang mga dancer maghukas sa ilang sapot.
“Daghang mga gwapa ug batan-ong dancer nga gustong mosayaw sa akong bar Philipp kay dili man sila magpakita sa pribadong parte sa ilang lawas. May thrilling,” giingnan ni Orchids ang news reporter.
Ihap-ihap ni Philipp, 14 ka batan-on ug gwapa nga dancer ang nagbanus-banos pagsayaw ug dili pa gani mapupos ang usa ka tukar, mobanus na usab ang laing dancer pagsayaw sa stage sa lain-lain nga pasundayag.
Dunay dancer nga nagsul-ob og rain coat nga transparent ug nagpayong samtang nagsayaw. Sihag ang rain coat ug makita ang iyang lawas sa ilawom mao nga nakahatag kini og thrill sa mga customer. Walay pupamilok si Philipp nga nagsud-ong sa gwapa nga dancer nga nagsayaw nga nagsul-ob og rain coat. “Orchids, ipaila-ila unya ko anang maong dancer ha,” matud ni Philipp nga nagpahiyom. “Sure.”
Nangabut ang mga kaubang reporters ni Philipp ug giabi-abi sila ni Orchids – libre ra sila sa pag-inom, walay bayad.
“Free lang mo karon kay opening pa man. Mas maayo hinuon nga inyong i-report sa taga CAIB nga walay trampas ang among pasundayag sa Wild Orchids Bar,” matud ni Orchids.
Mikilab ra ang mga oras. Wala gihapon mominus ang gidaghanon sa mga customers nga misulod sa bar nga nabag-ohan sa mga pasundayag sa Wild Orchids Bar. Hangtud nga miabut ang alas dos sa kaadlawon. Milanog ang tingog sa DJ. “Ladies and Gentlemen! The most awaited segment of our show, please welcome!….Wild Orchids on stage!!!!”
Makabungog ang pakpak sa mga customers, apil si Philipp mipakpak usab, dihang misaka na sa stage si Orchids. Misugod dayon pagpatukar ang DJ. Misamot og kaalegre kay dili binag-o ang tukar nga gipatugtog.
“Stay’ in Alive ug Night Fever” ni John Travolta maoy gisayawan ni Orchids. Apan dili sama sa uban nga mag-bikini ra ug mag-bra kun mosayaw sa stage, si Orchids nagsul-ob g’yud og attractive kaayo nga costume.
Misamot og dayeg ang mga customer kay lingaw kaayo sila sa lahi nga pasundayag nga ilang nasaksihan. Gilamano si Orchids sa mga customer. (Sumpayan)