Dili gayod tiaw ang akong kahibulong nga hapit nalang kada adlaw moadto si lolo Oming sa banko aron mag-withdraw sa iyang gideposito.
“Lo Oming, paliti unya ako og purol bisan usa nalang ka buok gikan sa nagbaligya nga ukay-ukay sa may tiyanggihan sa lungsod sa San Fernando!” gipamaraygan ko ang akong apohan sa dayon na niyang lakaw.
“Sa sunod nalang buwan Bartolo,” mubong pamalibad sa akong apohan nga sa iyang pagkatihik kanunay lang ako balibaran.
Sukad god ako nailong tuwapos, mao na lamang ang akong namat-an og buot nga diha na ako gimatuto ni lolo Oming uban sa naanhing kong apohan nga babaye nga si lola Imak.
Gumikan sa dili ko na maantus nga bugalbugal sa akong mga kasaring sa grade one ning among eskuylahan sa Pitalo Elementary School, naahat na lang ako sa pag-undang gumikan ning akong kahimtang nga gumikan sa kagision sa akong purol nga magkawilkawil nalang gani ang duha ko ka itlog, naputos ako sa bugalbugal.
Bisan tuod sa kadabong pa sa akong panuigon, nga may otso anyos, apan dili gayod kalikayan nga mobati ako og dili tiaw nga kauwaw, ilabi na sa akong mga classmates nga mga babaye?
Wa gayod diay aso nga makumkom, kay gikan ako nga nanirador og tukmo sa may bukiran sa Kampawog, naabtan ko si lolo Oming sa balay nga gikupogan og hawok ni manang Porlang.
Nauwaw baya ko sa gibuhat sa maong babaye nga nanulong og pamisita sa akong apohan? Nagpasalipod na lang ako sa may dakong punoan sa kaymito, ug mao na lang ang nasawod sa duha ko ka dunggan ang kaparaygon sa tingog ni Manang Porlang, nga nagkanayon:
“Tagbawon ko gayod ikaw akong darling nga Oming, kun imo akong palitan og Chinese gold nga kuwentas ug singsing, alang sa umaabot kong pagsaulog sa akong birthday!”
“Areglado kaayo kana akong honey ... ang imong gihangyo basta ikaw!” daling tubag sa akong apohan.
Ingon ako sa nasud-ipan nga nagpaminaw sa tinubagan ni lolo Oming. Nagmahay lang gayod ako nga kun mohangyo ako kaniya nga magpapalit bisan usa na lang ka buok purol modayon gilayon sa pagbalibad.
Kilumkilom kadto sa adlaw’ng Sabado. Hiabtan ko ang akong apohan nga nagbakho nga mao rang usa. Mangarisgar lang gayod ako og pangutana ug didto pa hisayri nga si Manang Porlang gitaban diay ni Siyoy, usa sa naila nga pinakaguwapo nga batan-ong ulitawo sa among dapit.
Ug mao na lamang akong nabati ni lolo Oming nga nagkanayon.
“Kinsay malipay akong apo nga Bartolo ... nga gawas siya gitaban ... giingnan pa gayod ako nga moduga pay gapas sa akong pagkatiguwang!” (Kataposan)