Usa ka adlaw niana si Juls nagaluhod ug nag-ampo sulod sa adoration chapel didto sa simbahan sa Guadalupe aron pagpangayo og pabor sa Kahitas-an nga unta ihatag na kaniya ang dugay na niyang gipaabot nga matuod nga gugma.
Nabaniog na kaayo si Juls sa ilahang dapit hilabi na sa iyang mga higala nga usa ka palikiro tungod sa pagkadaghang mga babaye nga nahimo niyang trato. Apan alang kang Juls igo lang siyang nituman sa pinitik sa iyang kasing-kasing, hilabi na nga ang mga babaye nga nahilambigit kaniya wala gyud makapasar sa iyang standard kadaghanan kanila maldita ug garbosa ug aduna puy dili ikabilin sa balay.
Iyaha na lang masayran gikan sa uban nga naay laing giiring-iringan ang iyang uyab samtang wala siya unya aduna pu’y buotan nga adunahan apan dili siya komportable ug kulang ang iyahang gibati nga kalipay sa ilahang panag-uban.
“Ginoo,” ni Juls pa nga nagsampit sa Diyos pinaagi sa pag-ampo sulod sa adoration chapel, “gipangayo ko Kanimo nga unta ihatag mo na ang babaye nga alang kanako ug hatagi ako og mga senyales aron sa pag-ila kaniya.”
Unya sa pagbarog ni Juls sa paghuman niya og ampo, iyang nakita sa atbang niyang nahimutangan ang maanyag nga babaye nga daw berhing nagrosaryo.
Wala kini niya panumbalinga tungod kay gigutom naman siya pag-ayo ug gikan pa usab siya sa tunghaan nga iyang gieskuwelahan. Pagkasunod nga adlaw niana, sa sayo nga kabuntagon nagsag-ob og tubig sa puso si Juls nga nahimutang ra usab duol sa iyang pinuy-anan aron magamit niya sa pagkaligo.
Ug sa pagpunay og bomba ni Juls sa puso, nisugat sa iyang panan-aw ang babaye nga diin mao usab ang iyang nakit-an didto sa adoration chapel. Nanglimpyo kini sulod sa balay nga dili ra usab layo sa nahimutangan sa puso.
Sa pagkahuman og bomba ni Juls niduol siya ngadto sa maong babaye.
“Miss! puwede makig-ila-ila?” ni Juls pa.
“Nganong dili kung dili dautan ang imong tuyo!” tubag sa babaye.
“Ako diay si Juls,” matud pa ni Juls ug nitunol sa iyang tuong kamot.
“Ako usab si Lore Jean,” sa babaye nga nidawat usab sa kamot ni Juls. “Ako diay ang bag-ong nagpuyo dinhi.”
Si Lore Jean ang madrihonon unta apan nigawas tungod sa pagpangita ug pagsubay usab sa iyang dalan sa kinabuhi kung diin dili ang pagka madre.
Sa pagpanglabay sa mga adlaw nahimo silang suod nga higala.
“Pasayloa ako Lore Jean kung mapangahason man ako pagbutyag kanimo sa akong gugma, gihigugma ko ikaw!’ ni Juls pa nga nikupot sa mga kamot sa babaye ug sa daw makahilis nga tinutokan.
“Kung tumong mo man aron idugang mo ako sa imong listahan Juls, dili ako makadawat sa imong gugma,” tubag ni Lore Jean.
“Dili Lore Jean, tinuod ang gugma ko kanimo ug sayod ako nga ikaw na gayud ang tubag sa akong mga pag-ampo tungod kay anaa kanimo ang tanang hiyas sa babaye nga akong gipangita,” ni Juls pa.
Niduko si Lore Jean sa iyang ulo ug ingon nga dili makaharong pagtan-aw kang Juls.
“Ikaw ang labing unang lalaki nga makadawat sa akong gugma ug ikaw lamang gayud sa tibuok kong kinabuhi.”
“Salamat Lore Jean!!! sa imong pagdawat ug pagsalig kanako, isaad ko dili man ikaw ang unang babaye alang kanako apan ikaw na gayud ang kataposan kong romansa ug wala nay lain pa.” Ni Juls pa nga napuno sa kalipay.
Ug tuod man nilabay ang mga adlaw ug katuigan, nakabaton og katumanan ang panaghigugmaay sa duha ka binuhat bugkos si Lore Jean ug Juls sa altar sa kaminyuon ug malipayon silang nanimuyo uban ang duha nila ka mga anak nga si John Jacob ug Sophia Eloisa. (Katapusan)