Nag-ampo si Colleen sa hilom nga mahiuli na unta ang iyang ate Alexa. Dili siya buot nga mosamot pa ang kasuko sa ilang amahan ngadto niini. Dili siya buot nga makasab-an sa ilang amahan ang iyang maguwang. Gimahal niya kini.
Quarter to twelve ang takna sa kagabhion. Wala pa gihapon makatulog si Colleen. Hangtod niining higayona, wala pa gihapon mahiuli ang iyang ate Alexa. Ang iyang amahan nagpabilin pa usab tingali didto sa sala kay nagsiga pa man ang suga. Mitimbakuwas si Colleen gikan sa iyang gihigdaan dihang nakadungog siya’g andar sa sakyanan nga mihunong sa tungod sa ilang balay. Milili siya sa may bentana. Iyang nasuta nga sila na gayod si Alexa ang nahiabot.
Paghikanaog ni Alexa sa sakyanan, dihadiha miaginod ang sakyanan sa ulitawo aron mopauli ngadto sa gipuy-an niini sa Whitehills Subdivision sa Banawa.
Mogawas unta si Colleen sa iyang kuwarto apan nausab ang iyang hukom. Nagpabilin na lang siya sa sulod sa iyang lawak ug naniid sa unsay sunod mahitabo.
Pagsulod ni Alexa sa sala, nabati ni Colleen nga gisugat dayon kini’g pangutana sa ilang amahan.
“Nganong karon ka lang mahiuli?” Gahi ang tingog sa ilang amahan. “Oras pa ba karon nga tingpauli sa usa ka babayeng tarong?” -- Sumpayan pa