Gula 68
Buntag sa adlaw’ng Domingo. Igo lang nakabiya ang ilang mga ginikanan paingon sa ilang puwesto sa prutasan sa Carbon, nabati ni Colleen nga may sakyanan nga mihunong sa tungod sa ilang balay. Unya nabati niya ang paglanog sa sagunson nga pagbusina.
Midali si Colleen paglili ngadto sa gawas gikan sa bentana sa iyang kuwarto. Wala gayod siya masayop sa iyang pangagpas. Si Jack ang nahiabot.
Migawas si Colleen sa iyang lawak. Mao usay paggawas ni Alexa sa lawak niini. Nag-ilis ang iyang maguwang.
“Manuroy mi si Jack, Sis,” ni Alexa pa. “Ikaw nay bahala dinhi sa ba’y.”
“Oo Ate,” tubag ni Colleen.
Migawas na si Alexa sa ilang balay. Nagdali kini pagpaingon sa sakyanan diin nagpaabot si Jack niini.
Igo lang milili si Colleen sukad sa may bentana sa sala. Ug gisundan niya sa iyang panan-aw ang Mustank nga inanay nang miaginod ug nagkalayo. Hangtod nga nawala kini sa iyang panan-aw.
Gibati ni Colleen ang kalaay dihang nag-inusara na lang siya sa balay. Maayo gani kay pagkataudtaod, nahiabot si Brendan.
“Manuroy ta,” hagad ni Brendan.
Tayming! Didto kini molanog sa hunahuna ni Colleen. Mao nga gisanong niya ang panghagad ni Brendan. Nagdali-dali siya’g ilis sa iyang kuwarto ug nanglakaw dayon sila. -- Sumpayan pa