Naglalis si Jino Sr. ug Jino Jr. ning bag-ohay pa lang nga pagsubang sa haring adlaw, nga maoy nakapautingkay sa ilang mga silingan tungod sa kadako sa ilang mga baba.
Gitapokan ang ilang panimay sa daghang mga silingan nga nakadungog sa ilang panaglalis. May nanaka sa bintana, may misud sa pultahan, may nilingkod sa sofa ug duna poy nagliyok kanila. Mora‘g naa sa buwangan.
Wala na makapanumbaling niini ang duha. Nalingaw ang ilang mga silingan sa ilang sininghagay apan wa hinuo’y dinapatay.
“Basta, ha...sa mouyon ka’g sa di, kuhaon mo gyud ang kurso nga pagkapari!” ni Jino Sr., namagawpagaw na intawon.
“Di ko, ikaw kong gusto ka!” matud ni Jino Jr., nga namagawpagaw na po’g siningka.
“Ayaw ko’g palagota!” ni Jino Sr. Migamit og special weapon, ka-tsak! “Magpari ka, o pusilon tika ining pistola?” nangugat nang liog. Gitionan sa bagulbagol si Jino Jr.
“Kalain ni Tatay, mamugos man.” Nakuyawan si Jino Jr. ug midanguyngoy. “Dauy! dauy....Tatay sab, uy! Imo gyud kong paparion bisa’g gusto kong magmadre!” iyang gikalkag ang buhok sa iyang ulo tungod sa kalagot.
“Unsa!!! mag-sister, ka?” kahikurat ni Jino Sr. mikatawa ug gipaubos ang pistola. “Kung mao na, kanus-a man ta magpa-enroll?” ni Jino Sr., nga nagwahing-wahing sa iyang bangs.
“Ugma!!! magkuyog tang tanan didto, ha!” matud sa mga silingan nilang laki ug dayong sininggitay’g katawa, nagkumotay sa ilang mga buhok ug nagkinusiay sa ilang mga bugan. Pwerte nilang lingawa sa lalis sa duha. (Kataposan)