Gula 31
Sila si Yana ug ang driver sa multicab nga si Jarren ingon sa nagkasuod na sulod lang sa pipila ka takna nga sila nagkatupad sa front seat sa ilang pagbiyahe. Mihagad si Jarren kang Yana nga mangaligo na sila.
“Ikaw, Colleen?” Gipahunat siya ni Yana.
“Dinhi lang ko, Yana,” ni Colleen.
“Di diay ka maligo?”
“Unya nang taudtaod.”
Mibiya na sila si Yana ug Jarren sa cottage diin nahibilin si Colleen. Mitipon sila ngadto nila ni Alexa, Cody, Rafal ug Katrin nga nagpalayo og diyotay sa ubang mangaligoay.
Nagsubo si Colleen nga nahibilin sa cottage. Nahisagmuyo siya kay nakakita man og partner si Yana. Kun wala pa si Jarren, segurado unta nga sila si Colleen ug Yana ang mag-uban sa pagpangaligo. Pero dali rang nagkasuod sila si Jarren ug Yana. Resulta, nahibilin si Colleen nga nag-inusara. Siya lang ang wala’y partner.
Gilingaw na lang ni Colleen ang iyang kaugalingon pinaagi sa pagtan-aw sa iyang mga kauban nga malipayong nangaligo sa dagat. Apan nabatyagan niya nga daw misakit ang iyang dughan nga nakakita nila ni Cody ug Alexa nga nagsinabligay sa pagpangaligo sa dagat. Naghagwa.
Mibati si Colleen og pangabubho. Nagselos siya sa kamalipayon nila ni Cody ug Alexa. Misamot ang iyang pagbasol kun nganong mikuyog siya sa pagpangaligo og dagat nila ni Alexa. Na-out-of place na siya, nasakitan pa gayod ang iyang kasingkasing. -- Sumpayan pa