Gula 64
Gumikan kay maayong midala si Flip sa ilang relasyon, hingpit nang nahulog ang pagbati ni Jackie ngadto sa lalaki. Nabatyagan niya sa iyang kaugalingon nga nahigugma na siya niini.
Apan wala madugay, namatikdan ni Jackie ang inanay nga paglubad sa kolor ni Flip. Nakabantay siya nga inanay nga nausab ang kinaiya niini.
Nagsugod ang tanan sa dihang gipasalida sa mga sinehan ang latest movie nila ni Jerome Celesta. Romance ang genre sa maong pelikula busa dili malikayan ang mga esena nga romantiko. May kissing scene si Jackie uban kang Jerome ug wala makauyon niini si Flip.
“Nganong wala man ko nimo pahibaloa nga may kissing scene kamo si Jerome sa maong pelikula?” Gisukmatan siya ni Flip.
“I-I’m sorry,” nagkanayon si Jackie. “Pero nagtuo kong okey lang kadto alang nimo. Dili ba miingon ka man nga makasabot ka sa matang sa akong trabaho?”
“Tinuod kana. Pero wala kana magpasabot nga makahimo ka na sa pagbuhat sa bisan unsa without consulting me.”
“Flip...?”
“Yes, Jackie. May katungod na ko nimo tungod kay imo kong boyfriend. Ug dili ko makatugot nga mainsultohan sa atong relasyon.” -- Sumpayan pa