Gula 5
Miduko si Janet dihang giarangkada na’g pangamoral ni Ronel.
“Jan, kun may luna man ako sa imong kasing-kasing, mohangyo ko kanimo nga ayaw ipadayon ang pagbalhin sa Manila. Ayaw ko’g talikdi Janet,” gigunitan ni Ronel ang wala nga kamot sa dalaga.
Pabiling nagpakahilom si Janet…. wala gayud motubag sa pangamoral ni Ronel. Nasabtan ni Ronel nga hinay-hinay’ng nalukmay niya ang dalaga. “May paglaum ba ako kanimo Jan?” gihinay pagpislit ni Ronel ang palad sa dalaga.
Gilingi paghinay ni Janet si Ronel. Nabantayan ni Ronel nga luhaan ang mga mata sa dalaga. “Nakapasakit ba ako kanimo Jan? Pasayloa ko kun nakapasakit ko kanimo. Sige dili na ako magsamok nimo Jan,” ni Ronel pa.
“Wala ka makapasakit kanako Ronel,” maaghop kaayo ang tonada sa pagkasulti ni Janet. Miginhawa’g lawom si Ronel nga nakadungog nga wala diay ikasuko ni Janet ang paghalad niya sa iyang gugma.
“Jan, kun mapakyas gihapon ako karon sa akong gugma ngadto sa babaye nga akong gimahal, mobiya usab ako dinhi sa Sugbo aron nga dili kaayo sakit alang kanako nga talikdan sa babaye’ng akong gipangga,” matud ni Ronel.
Mitutok si Janet kang Ronel. Ang kamot sa dalaga gigunitan pa gihapon sa ulitawo. Nabatyag ni Ronel nga gihugtan paggunit ni Janet ang iyang kamot. Nagtinutokay silang duha ug wala damha nga nagdikit na ang masi’g nila ka mga lawas.
“I love you Jan.. I love you,” puno sa pagmahal nga gigakus ni Ronel ang dalaga nga mibawos usab sa paggakus kaniya. “Ronel, akong lauman nga dili mo ako binuangan,” ni Janet pa ngadto sa ulitawo.
Sa sunod nga mga gutlo, nag-ukobay na ang masig nila ka mga ngabil nga daw uhaw kaayo sa mga pagmahal. Tunga sa oras ang milabay. “Hangyoon nako ang presidente sa among kompaniya Ronel nga ikanselar na lang ang akong pagbalhin didto sa Manila.”
Daw giluparan og langgam buntog sa kalipay ang dughan ni Ronel nga nakadungog sa gisulti sa dalaga.
“Ang tinuod, dili g’yud gusto ang among manager nga mobiya ko dinhi sa Cebu apan napugos lang pagtando ang among presidente. Sigurado ko nga dili siya mobalibad sa akong hangyo pag-usab,” ni Janet pa. Taud-taud, may nanuktok sa pultahan. Gili-li ni Janet ug hilabihan ang iyang kakulba. (Sumpayan)