Gula 51
Pag-abot nila sa may Alabang nag-aginod na ang pagdagan sa ilang gisakyan kay huot na kaayo ang trapiko. Gisandig ni Jackie ang iyang bukobuko sa sandiganan sa lingkoranan sa sakyanan. Gipiyong niya ang iyang mga mata apan nagbuka ang iyang mga dalunggan nga nagpaminaw sa kanta nga gipangtugtog sa stereo.
Apan mitingkag ang iyang mga dalunggan dihang mao nay gitugtog ang kanta nga nag-ulohan og “Lucky” nga gipasikat ni Britney Spears. Ingon sa siya’y girumbo sa maong awit nga nagtuki ug naghulagway sa kinabuhi sa usa ka sikat nga artista nga walay hinigugma.
Natandog ang iyang balatian pagkadungog sa maong kanta ilabi na sa chorus niini nga nagkanayon: “Isn’t she Lucky/ This Hollywood girl/And the say/She’s so lucky/ she’s a star/ but she cry, cry, cries/ In her lonely heart/ Thinkin’/ If there’s nothin’ missin’ in my life/Then why do these tears come at night.”
Nahimangod si Jackie nga nakadungog sa maong kanta. Alang niya, ingon sa siya’y gipasabot sa mensahe sa maong kanta. Haom sa iyang sitwasyon ang mensahe niini. Mora ba’g gisungog siya sa kanta nga gitugtog sa stereo.
“Pawonga kanang stereo, Noy Teryo,” giingnan ni Jackie ang driver.
“Oo, Ma’am,” matud ni Noy Teryo nga midali pagpawong sa stereo sa sakyanan. -- Sumpayan pa