Gula 49
Mi-demand usab si Joy og mas taas nga talent fee alang kang Jackie ug ingon man kang Jerome Celesta. May sukaranan ang pagtaas sa talent fee sa duha ka magka-loveteam tungod kay napamatud-an man nila nga dekalidad silang artista tungod sa ilang pagdaog sa milabay nga filmfest.
Nahimo usab nga best seller ang latest album ni Jackie. Naka-triple platinum kini tungod sa kakusog sa halin niini sa mga music bar. Nagtuo si Jackie nga epekto gihapon kini sa iyang pagdaog sa Pilipino Film Festival.
Nadugangan na usab og lain ang daan nang daghan niyang commercial endorsements. May infomercial na usab siya nga gihimo ubos sa usa ka ahensiya sa gobyerno diin dako kaayo ang iyang talent fee.
Ang iyang ngalan ug panagway makita na sa dagkong billboards sa kaulohan ug sa ubang dagkong siyudad sama sa Cebu, Cagayan de Oro, Iloilo, Davao, Dumaguete ug uban pa tungod sa lainlaing mga produkto nga iyang gipang-endorso.
Malipayon si Jackie sa hapsay kaayong dagan sa iyang showbiz career. Apan iyang nabatyagan nga ingon sa dili hingpit ang iyang kalipay. May kahaw-ang ang iyang kasingkasing tungod kay zero ang iyang lovelife.
Gugma! Kini ang panginahanglan sa iyang kasingkasing nga dili kahulipan sa bisan unsang materyal nga mga butang. Gikinahanglan niya ang gugma sa lalaki nga mao usab ang matuod niyang gihigugma. Si Ethan! -- Sumpayan pa