Gibaktas ni Romel ang hilit kaayong agianan padulong sa balay sa iyang higalang mananggiti. Wala gayud siya malimot sa adlaw nga ubay-ubay ang nakuhang tuba sa iyang higala.
Gusto man gud ni Romel nga modimdim sa kalami ug katam-is sa tuba sa iyang higala. Ug sa paghiabot niya sa nataran sa panimalay sa iyang higala. Gisugilon dayon niya ang iyang tumong.
"Pre! Naa kay tuba diha pre?" niya pa. "Wala!" ni Senit pa, ang higala niyang mananggiti o mananggot.
"Ah!" wala diay pre? Abi ko'g naa! naa ra ba ta ko’y sinugba nga isda didto da! Atoa unta tong ipulutan", ni Romel pa nga dala paibog nga inistoryahan.
Wala dayon makatingog si Senit ngadto ni Romel kay nakapang-lad-ok kini sa iyang laway, nga naghuna-huna sa sinugbang isda nga gipanghambog sa iyang higalang mamasolay.
"Geh!" pre oy! Di lang ko magdugay, wala man kaha? Sunod nalang!" ni Romel pa nga mopahilayo na unta.
"Pre!" pre! Ikaw ba! Dili gayud ka ma komedyahan. Moingon gani kong wala! Atomatik naa na!" ni Senit pa nga gahinam-hinam nga naghuna-huna sa sinugbang isda, "ah!" mao ba! Pre?" ni Romel pa.
"Unya asa man ta mag-inom?' Sukna sa iyang higalang mananggiti. "Ah!" kuan didto ra ta mag-abot sa tindahan ni Nang Janeth" matud usab ni Romel ngadto sa iyang higala.
Ug tuod man didto sa tindahan ni Nang Janeth, ang suki nilang utanganan og mga ilimnong makahubog. Gisugdan nila sa walay tihik-tihik nga pag-la-la ang usa ka galong tuba.
Apan sa tunga-tungang bahin sa ilang pag-inom. Kalit nang lamba og mga lingkuranan ang higala niyang mananggiti nanghagis kini kay tiaw bang hapit nalang daw maubos ang iyang tuba, wala man gani siya nakakita sa bisan anino lang sa giingon niining sinugba.
"Asa na?' ang giingon mong pulotan pre?!" sa mananggiti pa nga nagpangagot sa iyang ngipon sa tumang kalagot. "Ay! Pre! Wala gud diay ta! Magkasinabot ani pre! Di ba ingon ka! Nga kong moingon kang wala! Naa na di ba?! ni Romel pa ngadto ni Senit.
"Oh! tinuod na! Unya unsa may kalibotan ana! sa gipangita kong sinugba nga ato untang ipulutan?" sumbalik usab ni Senit.
"Aw! Daku pre! Kung moingon pud gani kung naa! Siyempre! wala pud na!" ni Romel pa, dayon lad-ok sa usa ka basong tuba nga giipis niini.
Ug diha-diha ang higala niining manananggot nagbagolbol kini ug sa wala pa kini mobiya sa tindahan ni Nang Janeth, nga ilahang giimnan ni bahad kini.
"Ayaw lang gud pakita nako'g usab animala ka! Kay gulgulon ko gyud nang ulo nimo!" matud pa niini nga hilabihang kalagot.
Ug sa huna-huna ni Romel "Dah! ika'y ga-una-una!" (Kataposan)