Gula 80
“Gitakda na ang atong kasal, Melvin. Puyde bang di na nato ilakip sa esena si Edelmar?”
“Ang imong kalipay ang akong gilantaw, An. Busa kun mas bug-at si Edelmar sa imong kasingkasing kay kanako, mahimong isibog nato ang atong kasal.”
Taudtaod nang nakalakaw si Melvin apan nahibilin si Annie sa sala nga nagpadayon sa paghinuktok. Gikuligaw sa kalibog ang iyang utok. Wala siya masayod kun unsay angay niyang buhaton.
Nia kining lalaki nga nahigugma kaniya ug andam magsakripisyo tungod ug alang sa iyang kalipay. Si Melvin. Nia usab ang lalaki nga maoy matuod niyang gihigugma apan nakahimo’g dakong pagkuwang kaniya. Si Edelmar. Kinsa kanilang duha ang iyang pilion?
Gumikan sa kalawom sa iyang paghunahuna, wala siya makamatikod sa paghiabot ni Edelmar. Naigking kini dihang nangatahoran kini kaniya.
“Pasayloa ko kun nakatugaw ko sa imong paghinuktok,” nagkanayon si Edelmar. “Lawom gayod tingali ang imong gihunahuna.”
Wala siya motingog. Si Edelmar milingkod sa iyang atbang.
“Di ko gustong magsamok sa imong kinabuhi, An,” ni Edelmar pa. “Mahimong kini na ang kataposan natong panagkita. Duna lang koy gustong masayran gikan nimo.”
“U-unsa kana?” sukit ni Annie.
“Gusto kong masayod kun may paghigugma ka pa ba nako.”
Wala motubag si Annie.
“Sultihi ko sa tinuod, An. Nahigugma ka pa ba nako? O wa na? -- Sumpayan pa