Alas 7:30 sa buntag. Wa pay abli ang munisipyo sa lungsod sa Sahagun. Naglingkodlingkod na si Charlie sa plasa atubangan sa munisipyo. Gusto siyang maoy makauna pagsulod sa Office of the Local Civil Registrar. Nagdala siya’g duha ka affidavit. Una ang affidavit ni Daphne iyang kapikas. Ug ikaduha ang affidavit nilang managtiayon.
Ang duha ka affidavit may covering letter gikan ni Atty. Bert Juarez, ang abogado nga nagpreparar ug nagnotaryo sa mga dokumento. Ipaenrol na nila sa grade one ang kamaguwangang anak ni Daphne nga anak niya sa pagkadalaga. Ang ikaduhang anak ni Daphne ila nang duha ni Charlie. Way problema sa birth certificate. Ang komplikado ang birth certificate ni Fiona.
Assistant Pastor si Charlie sa Divine Love Ministry, usa ka Christian Church sa baryo Tacana di layo sa poblasyon sa ilang lungsod. Binunyagan nga member sa maong simbahan si Daphne. Nagkasuod sila ug nagkasayranay sa ilang mga kaagi. Nagkaluy-anay sila sa usa’g-usa nga puro pakyas sa unang mga gugma. Ug ang kalooy nila sa usa’g-usa nilamay ngadto sa paghigugmaay. Nagpakasal sila human nipasalig si Charlie nga ilhon nga anak niya ang kamaguwangan ni Daphne. Gituman ni Charlie iyang saad. Mapinanggaon kaayo siya ni Fiona.
Nakurat si Charlie pagkabasa sa birth certificate ni Fiona.Kay nagdahum siya nga way ngalan sa amahan ang maong sertipiko. Kay lagi wa niangkon ang amahan nga kanhi uyab ni Daphne nga maoy nakakum-os sa mga gihay sa naulahi. Apan may ngalan sa amahan. Ang nakaparat kay ngalan pa gyud sa foreigner. Usa ka Swiss national nga si Wilhelm Wolf. "Unsa man ning hitaboa? Nga may niangkon man laging amahan ni Fiona?" ni Charlie ngadto’s iyang kapikas pag-uli niya gikan sa munisipyo paghuma’g kuha sa sertipiko. Wa katingog si Daphne.
"Kinsa man ning Wilhelm Wolf?" ni Charlie. Masuk-anon. Nagselos. "A kana, nangulitawo sab na nako. Buntis nako adtong higayona apan di pa klaro. Dihang nibalibad ko niya nga buntis ko, nisamot hinoon og pangulitawo. Kay siya ang moangkong amahan sa bata.
Wa man mi relasyon adto. Ang nakapabuntis gyud nako si Greg. Nilayas pagkasayod nga wa na ko duawa sa akong binulang sakit. Hapit ko maghikog pagkasayud nga nilayas siya. Apan naam-aman lang ko sa akong mga higala. Kay motabang kono sila’g buhi sa bata. Sila sab ang nagpaila-ila ni Wilhelm ngari nako" ni Daphne. "Unya wa diay ka nisupak?" ni Charlie.
"Wa gyud ko kasupak. Kay wa man ko kabantay. Nga pagbati nako, nisunod diay siya sa Maternity House. Dunay komplikasyon akong pagmabdos. Pagkahimugso sa bata, nakuyapan man ko. Maong wa gyud ko kasupak nga nibuluntaryo si Wilhelm nga siya ang amahan sa bata. Iyang ngalan ang nabutang sa birth certificate. Naghambog pang kasado mi. Gihatagan og kuwarta ang midwife. Wa nalang sab nidaghang kuti. Kuwarta na god," ni Daphne. "Hain na man si Wilhelm ron?' ni Charlie. "Nibalik sa Switzerland. Naminyo na man siya sa akong ig-agaw nga si Hilda," ni Daphne. Nikatawa nalang si Charlie. Ug nakahukom nga mangunsulta.
Sa bupete ni Atty. Juarez, gidiktar dayon sa abogado ngadto sa iyang sekretarya ang buhatonong mga affidavit. "Ang akong tuyo attorney nga ang ngalan nako maoy mabutang nga ngalan sa amahan ni Fiona, sa iyang sertipiko" ni Charlie sa pagsugod niya’g konsulta sa abogado. "Sayon ra na. Si Daphne kinahanglan mopirma og affidavit nga dili si Wilhelm ang amahan sa bata. Ug ikaw ang ngalan nga amahan sa bata. Wa lang ka diha pagkahimugso sa bata kay naasayin ka sa Mindanao. Ug kamong duha managtiayon mopirma nga sa pagkahimugso ni Fiona, puro mo daga’g ulitawo. Way kabilinggan sa kaminyoon sa laing binuhat. Unya dangtag pila ka tuig sa pagkatawo sa bata, nagpakasal mo. Kay sugo gyud sa matuod nga paghigugma sa usa’g usa." sa abogado. "Balaknon man sab diay ang maong mga affidavit," ni Charlie nga nagpahiyom.
Pag-abli sa munisipyo mahinamon nga nitindog si Charlie. Lagsik iyang lakang padulong ngadto sa pultahan sa Office of the Local Civil Registrar. (Kataposan) (Sa gusto’g libreng konsulta, dad-a ning pahina sa opisina sa tagsulat. Sa Sabado sa buntag)