Gula 31
Nagdumili unta si Ethan sa pagtindog. Apan giapura kini sa ubang manan-away nga pahinuntan si Jackie. Milugos pagtindog si Ethan nga maulawon.
Gidala ni Jackie si Ethan ngadto sa taas sa stage. Misibaw ang siyagit sa pag-abiba ug pagakpak gikan sa crowd nga ingon sa nahimuot pag-ayo sa gihimong paukyab ni Jackie.
Nagdumili unta si Ethan pagsaka sa stage apan iya kining gisenyasan nga mopasagnunot na lang kaniya. Nagpadayon gihapon siya sa pagkanta hangtod nga hingpit na silang nakasaka sa stage.
Mora’g kandela nga giugbok si Ethan nga nagbarog sa stage. Si Jackie didto na moatubang sa ulitawo samtang nagpadayon siya sa pagkanta. Mora ba’g si Ethan ang gihalaran niya sa maong kanta. Hugot niyang gigunitan ang tuong kamot niini. Ang crowd misamot pag-abiba.
Dihay tingog nga naggikan sa pundok sa mga tumatan-aw nga nag-awhag kang Ethan sa pagpakig-duet kang Jackie. Kusganon kaayo ang awhag sa crowd nga mag-duet sila si Jackie ug Ethan.
Ambot kun unsang lalanga sa yawa, si Ethan mora’g nadala sa awhag sa mga tawo. Mikanta kini sa pagpakigduhawit kang Jackie sa kataposang bahin sa chorus nga nagkanayon: “Pangako hindi kita iiwan/ Pangako ‘di ko pababayaan/Pangako hindi ka na mag-iisa/ Pangakong magmula ngayo’y tayong dalawa ang magkasama/ Pangako...pangako.” -- Sumpayan pa