Lahi sa kumbati nilang Alex ug Liza didto sa dagat, mas mahinamon kaayo ang ulitawo kay nabantang na gayud sa iyang panan-aw ang kinatibuk-an sa bigot kaayo nga lawas sa dalaga.
Gidali-dali ni Alex ang paghukas sa iyang sapot. Giromansa niya pag-ayo si Liza pinaagi sa pagpakaligo sa kinatibuk-an niyang kalawasan sa mga hawok nga nagdala’g gilok.
Hangtud nga matagbawon nila nga gisaw-an ang kalipay ibabaw na gayud sa kama -- sa higdaanan ni Liza sa inabangan niyang lawak. “Talagsaong kalipay ang akong gibati uban kanimo Alex,” ni Liza pa human sa ilang kumbati.
Nakatulog silang duha nga naggaksanay nga walay mga sapot. Pagka-kaadlawon, alas kwatro pa mibangon na si Liza kay alas singko ang trabaho niya sa gitrabahoan niyang tindahan.
Nahigmata na usab si Alex. Dali nga nag-ilis ang ulitawo sa iyang mga sapot. “Magkuyog na lang ta Liz kay moderitso na lang usab ko sa siyudad. Ang bus nga akong gisakyan gahapon mao sa’y sakyan nako pagpadayon sa akong biyahe.”
Wala pa kaayo’y mga customers sa tindahan pag-abut nila ni Alex ug Liza. Gisungog sila sa mga kaubang tindera ni Liza kay nakabantay nga nagkuyog sila sa maong oras sa kaadlawon.
Taud-taud, miabut ang bus nga gikan sa San Remigio nga gisakyan ni Alex kagahapon. Nanganaug ang mga pasahero ug mipalit og makaon. “Liz mopadayon na ako sa biyahe nako paingon sa siyudad. Mobalik ra ko dinhi kun buhi pa ko,” dalang komedya ni Alex.
Tuod man, wala magdugay ang bus pagparking, milarga na kini paingon sa siyudad ug luwan na niini si Alex. Didto maglingkud si Alex sa luyo nga bahin sa bus kay wala na may lingkoranang bakante.
Milabay ang kapin sa oras. May mga sakyanan nga gikan sa siyudad nga mihunong sa tindahan ug mipalit og makaon ang mga sakay.
Nadunggan ni Liza nga nagsultihanay ang mga pasahero nga may bus nga paingon sa siyudad nga nadam-agan og kusug nga nagdagan nga trailer truck.
Maayong pagkakupog sa luyong bahin sa bus ug daghan ang nangamatay. Gikulbaan si Liza. Misantop sa iyang huna-huna si Alex. “Unsa’y rota sa bus nga gibanggaan Ma’am?” mausisahon kaayo si Liza.
Daw nakuyapan si Liza pagkadungog niya sa tubag. “Hagnaya-San Remigio.” Mao kadto ang bus nga gisakyan ni Alex! Wala masayup si Liza, usa g’yud si Alex sa mga pasahero nga namatay. (Kataposan)